മാരുതി സുസുക്കിയുടെ പുതിയ മൈക്രോ എസ്.യു.വി മോഡലായ എസ്-പ്രെസോയുടെ സ്കെച്ച് കമ്പനി പുറത്തുവിട്ടു. വാഹനം വിപണിയിലെത്തിക്കുന്നതിന്റെ മുന്നോടിയായാണ് ചിത്രങ്ങള് പുറത്ത് വിട്ടത്. ഈ മാസം 30-ന് കാര് വിപണിയിലെത്തിക്കുമെന്നാണ് അധികൃതര് പുറത്ത് വിട്ട വിവരം. കാറിന് 3.3 ലക്ഷം രൂപമുതല് 4.5 ലക്ഷം രൂപ വരെയായിരിക്കും വില. സ്റ്റൈലിഷ് വാഹനമായിരിക്കും എസ്-പ്രെസോയെന്നാണ് പുറത്ത് വരുന്ന വിവരം.
കണ്സെപ്റ്റ് മോഡലില് വലിയ മാറ്റങ്ങള് വരുത്താതെയാണ് മാരുതിയുടെ ഹാര്ട്ടെക്ട് പ്ലാറ്റ്ഫോമില് ബോക്സി ഡിസൈന് ശൈലിയിലാണ് എസ്-പ്രെസോ നിര്മിച്ചിരിക്കുന്നത്. ആള്ട്ടോയെക്കാള് വലുതും ബ്രെസയേക്കാള് ചെറുതുമാണ് ഈ വാഹനം. നീളത്തില് ക്വിഡിനേക്കാള് കുഞ്ഞനും ഉയരത്തില് ക്വിഡിനെക്കാള് വലിയ വാഹനവുമാണ് എസ്-പ്രെസോ. ഒമ്പത് വേരിയന്റുകളിലായാണ് പുതിയ കാര് വില്പനയ്ക്കെത്തുക.
റെനോ ക്വിഡ്, മഹീന്ദ്രയുടെ കെയുവി 100 എന്നീ വാഹനങ്ങളുടെ എതിരാളിയായാണ് മാരുതി എസ്-പ്രെസോയെ അവതരിപ്പിക്കുന്നത്. മസ്കുലാര് ബോഡിയും ക്രോമിയം ഗ്രില്ലും എല്ഇഡി ഹെഡ്ലാമ്പ്, ഡിആര്എല്, സ്കിഡ് പ്ലേറ്റ് എന്നിവയടങ്ങുന്ന എക്സ്റ്റീരിയറും ഫീച്ചര് സമ്പന്നമായ ഇന്റീരിയറുമായിരിക്കും വാഹനത്തിനെ അലങ്കരിക്കുക.
67 ബിഎച്ച്പി പവറും 91 എന്എം ടോര്ക്കുമേകുന്ന 1.0 ലിറ്റര് മൂന്ന് സിലിണ്ടര് പെട്രോള് എന്ജിനായിരിക്കും ഈ വാഹനത്തിന് കരുത്തേകുക. അഞ്ച് സ്പീഡ് മാനുവല്, എഎംടി ട്രാന്സ്മിഷനുകളില് ഈ വാഹനം പ്രതീക്ഷിക്കാമെന്നാണ് സൂചന.
