ന്യൂയോര്ക്ക്: ലോകത്തെ ഏറ്റവും വലിയ കോടീശ്വരന് എന്ന പദവി ആമസോണ് സ്ഥാപകനും സി.ഇ.ഒയുമായ ജെഫ് ബെസോസിന് നഷ്ടമായി. മൈക്രോസോഫ്റ്റ് സ്ഥാപകന് ബില് ഗേറ്റ്സ് 10,570 കോടി ഡോളര് ആസ്തിയുമായി ഒന്നാം നമ്പര് കോടീശ്വര പട്ടം തിരിച്ചുപിടിച്ചു.
സാമ്പത്തിക വര്ഷത്തിന്റെ മൂന്നാംപാദത്തില് ആമസോണിന്റെ ഓഹരികളില് വന് ഇടിവുണ്ടായതാണ് ബെസോസിന് തിരിച്ചടിയായത്. ആമസോണിന് മൂന്നാം പാദത്തില് 26 ശതമാനം നഷ്ടമാണ് ഉണ്ടായത്. ആമസോണിന്റെ ഓഹരികളുടെ മൂല്യത്തില് 700 കോടിയോളം ഡോളറിന്റെ ഇടിവാണ് രേഖപ്പെടുത്തിയത്. ഇതോടെയാണ് ബില്ഗേറ്റ്സിന് വീണ്ടും ലോകത്തെ ഒന്നാം നമ്പര് പദവി ലഭിച്ചത്.
റിപ്പോര്ട്ടുകള് പുറത്ത് വന്നതോടെ ആമസോണിന്റെ ഓഹരികളില് വീണ്ടും ഇടിവുണ്ടായി. ഏഴ് ശതമാനം ഇടിവാണ് വിപണിയില് ഉണ്ടായിരിക്കുന്നത്. ഇതോടെ ബെസോസിന്റെ വരുമാനം 103.9 ബില്യനായി. എന്നാല് മൈക്രോസോഫ്റ്റ് സഹസ്ഥാപകന് ബില്ഗേറ്റ്സിന്റെ ആസ്തിയിപ്പോള് 105.7 ബില്യനാണ്.
24 വര്ഷം തുടര്ച്ചയായി ഒന്നാംസ്ഥാനം കൈയടക്കിവച്ച ഗേറ്റ്സിനെ രണ്ടാംസ്ഥാനത്തേക്ക് പിന്തള്ളി 2018-ലാണ് ബെസോസ് ഏറ്റവും വലിയ കോടീശ്വരനായത്. 160 ബില്യന് ഡോളറിന്റെ ആസ്തിയാണ് അന്ന് ബെസോസിന് ഉണ്ടായിരുന്നത്. 2017-ന് ശേഷം ആദ്യമായാണ് കമ്പനിക്ക് ഇത്രവലിയ നഷ്ടമുണ്ടായതെന്നും ഫോബ്സ് റിപ്പോര്ട്ട് ചെയ്തു. വ്യാഴാഴ്ച നടന്ന വ്യാപാരത്തില് ആമസോണിന്റെ ഒരു ഓഹരിക്ക് 1,624 ഡോളറിന്റെ നഷ്ടമാണ് ഉണ്ടായത്.1998ല് അമേരിക്കയിലെ 400 ധനികരുടെ പട്ടികയില് ബെസോസ് ഇടം നേടിയിരുന്നു. അന്ന് 1.6 ബില്യനായിരുന്നു കമ്പനിയുടെ ആസ്തി.