ഓണ് റോഡിലും ഓഫ് റോഡിലും ഒരുപോലെ കരുത്തനാണ് മഹീന്ദ്രയുടെ ഥാര്. പ്രായ ഭേദമന്യേ രാജ്യത്താകമാനമുള്ള വാഹന പ്രേമികളുടെ ഇഷ്ട വാഹനമായ ഥാര് അടിമുടി മാറ്റങ്ങളുമായി വിപണി പിടിക്കാനൊരുങ്ങുകയാണ്. എന്നാല് ആരാധകര്ക്ക് സന്തോഷം നല്കുന്ന വാര്ത്തയാണ് ഇപ്പോള് പുറത്തു വരുന്നത്. ഔദ്യോഗിക സ്ഥിരീകരണം ലഭിച്ചിട്ടില്ലെങ്കിലും പെട്രോള് എന്ജിനും ഓട്ടോമാറ്റിക് ഗിയര് ബോക്സുമാണ് ആരാധകര്ക്കായി മഹീന്ദ്ര കാത്തുവെച്ചിരിക്കുന്നത് എന്നാണ് സൂചന.
ജീപ്പ് റാംഗ്ലറിനെ അനുസ്മരിപ്പിക്കുന്ന വാഹനമാണ് പുതുതായി എത്തുന്നതെന്നാണ് റിപ്പോര്ട്ടുകള് വ്യക്തമാക്കുന്നത്. റാംഗ്ലറിന്റേതിനു സമാനമായി ഊരി മാറ്റാവുന്ന ഹാര്ഡ്ടോപ് മോഡലിലും ഥാര് ലഭ്യമാകും. മഹീന്ദ്രയുടെ തന്നെ എക്സ്യുവി 500ന്റെ പെട്രോള് പതിപ്പിലുള്ള 2.2 ലിറ്റര് പെട്രോള് എന്ജിന്റെ ബിഎസ് 6 പതിപ്പാണ് പുതിയ ഥാറിലുണ്ടാകുക. ഇത് 140 ബിഎച്ച്പി പവറും 320 എന്എം ടോര്ക്കും ഉത്പാദിപ്പിക്കും. ടോര്ക്ക് കണ്വര്ട്ടര് ഓട്ടോമാറ്റിക് ഗിയര്ബോക്സും പുത്തല് ഥാറിലുണ്ടാകും.
രാജ്യാന്തര വിപണി കൂടി ലക്ഷ്യമിട്ടാണ് മഹീന്ദ്ര പുതിയ ഥാര് വിപണിയിലെത്തിക്കാന് ഒരുങ്ങുന്നത്. കാഴ്ചയില് പ്രകടമായ മാറ്റങ്ങളുമായെത്തുന്ന ഥാറിന്റെ മുന്ഭാഗത്ത് ഏഴ് സ്ലാറ്റ് ഗ്രില് നല്കിയിട്ടുണ്ട്. വൃത്താകൃതിയിലുള്ള ഹെഡ്ലാമ്പും എല്ഇഡി ഇന്ഡിക്കേറ്ററും വാഹനത്തിന്റെ കരുത്ത് പ്രകടമാക്കുന്ന തരത്തിലാണ് രൂപകല്പ്പന ചെയ്തിരിക്കുന്നത്.
വലുപ്പം കൂട്ടി കൂടുതല് കരുത്തനായാണ് പുതിയ ഥാര് എത്തുന്നത്. പഴയ വാഹനത്തില് നിന്ന് വ്യത്യസ്തമായി ബ്ലാക്ക് ഫിനിഷിലാണ് ഇന്റീരിയര് ഒരുക്കിയിരിക്കുന്നത്. ടോപ്പ് എന്ഡില് വലിയ ടച്ച് സ്ക്രീന് ഇന്ഫോടെയ്ന്മെന്റ് സിസ്റ്റവും നല്കിയിട്ടുണ്ട്. ഒപ്പം ഡ്യുവല് എയര് ബാഗും എബിഎസും വാഹനത്തിന്റെ സുരക്ഷ വര്ധിപ്പിക്കുന്നു. ഥാറിനെ 2020 ഫെബ്രുവരിയില് നടക്കുന്ന ന്യൂഡല്ഹി ഓട്ടോഎക്സ്പോയില് പ്രദര്ശിപ്പിക്കുമെന്നാണ് പ്രതീക്ഷിക്കുന്നത്.
