കോംപാക്ട് സെഡാന് സെഗ്മെന്റിലേക്ക് ഹ്യുണ്ടായി പുറത്തിറക്കുന്ന ഓറയുടെ സ്കെച്ച് പുറത്തുവിട്ടു. പുതിയ ഐ-10 നോട് സാമ്യതയുള്ള രൂപ ഭംഗിയോടെയാണ് ഓറ ഇറങ്ങുന്നത്. ഡിസംബര് 19-തിന് ഓറയുടെ ആദ്യ പ്രദര്ശനം ഇന്ത്യയില് നടക്കും.
ബിഎസ്-6 നിലവാരത്തിലുള്ള 1.2 ലിറ്റര് പെട്രോള്, ഡീസല് എന്ജിനുകളാണ് ഓറയ്ക്ക് കരുത്തേകുക. ഹ്യുണ്ടായി വെന്യുവില് നല്കിയിട്ടുള്ള 1.0 ലിറ്റര് ടര്ബോ ചാര്ജ്ഡ് പെട്രോള് എന്ജിന് എന്നിവയും ഹ്യുണ്ടായി ഓറയ്ക്ക് കരുത്തേകുമെന്നാണ് നിര്മാതാക്കള് നല്കുന്ന സൂചന.
നിയാസില് നിന്ന് കടമെടുത്ത കേസ്കോഡ് ഗ്രില്ല്, പ്രൊജക്ടര് ഹെഡ്ലാമ്പ്, ബൂംറാംങ് ഷേപ്പിലുള്ള ഡിആര്എല് എന്നിവയാണ് മുന് ഭാഗത്തെ അലങ്കരിക്കുന്നത്. മാത്രമല്ല ഡ്യുവല് ടോണ് ഡയമണ്ട് കട്ട് അലോയി വീലും പുതിയ മിറര്, ഷാര്ക്ക് ഫിന് ആന്റിന, ഡ്യുവല് ടോണ് റൂഫ്, എല്ഇഡി ടെയില്ലാമ്പ് തുടങ്ങിയവയും ഓറയില് ഉണ്ട്.
അഞ്ച് സ്പീഡ് മാനുവല് എഎംടി ഗിയര്ബോക്സുകളായിരിക്കും പുതിയ കാറില്. പുത്തന് പവര് ട്രെയ്നുകള്ക്കു പ്രകമ്പനം കുറവാണെന്നതിനു പുറമേ മികച്ച പ്രകടനം കാഴ്ചവയ്ക്കാനുമാവുമെന്ന് ഹ്യുണ്ടായ് അവകാശപ്പെടുന്നു. പ്രകടനത്തിലെ കാര്യക്ഷമത ഉയരുന്നതിനൊപ്പം ഇന്ധനക്ഷമതയിലും മികവ് പ്രതീക്ഷിക്കാം.
