ദുബായ്: ക്രിക്കറ്റ് രംഗത്ത് ഇന്ത്യയുടെ ടെസ്റ്റിലെ ഒന്നാം നമ്പര്‍ പദവി നഷ്ടപ്പെട്ടു. ഐസിസി ഇന്ന് പ്രഖ്യാപിച്ച പുതിയ പട്ടികയില്‍ ഒസ്‌ട്രേലിയക്കും ന്യൂസിലാന്റിനും പുറകില്‍ ഇന്ത്യ മൂന്നാം സ്ഥാനത്തേക്കാണ് പിന്തള്ളപ്പെട്ടിരിക്കുന്നത്. പോയിന്റ് നിലയില്‍ ഓസ്‌ട്രേലിയക്ക് 116 ന്യൂസിലാന്റിന് 115 എന്ന നിലയിലാണ്. ഇന്ത്യക്ക് 114 പോയിന്റാണുള്ളത്. എന്നിരുന്നാലും ഐസിസി ടെസ്റ്റ് ചാമ്പ്യന്‍ഷിപ്പ് പോയിന്റില്‍ ഇന്ത്യതന്നെയാണ് ഒന്നാമതെന്നും ഐസിസി പറഞ്ഞു. ടി20യില്‍ പാകിസ്താനെ പിന്തള്ളി ഓസ്‌ട്രേലിയ തന്നെ മുന്നിലെത്തി. 2011ന് റാംങ്കിംഗ് വന്ന ശേഷം ആദ്യമായാണ് ഓസ്‌ട്രേലിയ ടി20യില്‍ ഒന്നാമതെത്തുന്നത്.
2016 ഒക്ടോബറിനുശേഷം ആദ്യമായാണ് ഇന്ത്യക്ക് ടെസ്റ്റില്‍ ഒന്നാം സ്ഥാനം നഷ്ടമാകുന്നത്. ഇതിന് കാരണം 2016-17 സീസണില്‍ ഇന്ത്യ 12 ടെസ്റ്റ് വിജയങ്ങള്‍ നേടിയപ്പോള്‍ ആകെ ഒരെണ്ണത്തില്‍ മാത്രമാണ് പരാജയപ്പെട്ടത്. ഓസ്‌ട്രേലിയക്കും ഇംഗ്ലണ്ടിനുമെതിരെ 5 ടെസ്റ്റുകളുടെ പരമ്പര നേടി ഇന്ത്യ ചരിത്രത്തിലെ ഏറ്റവും വലിയ വിജയക്കുതിപ്പാണ് അന്ന് നടത്തിയത്. അതേ കാലഘട്ടത്തില്‍ ഇന്ത്യയോടും ദക്ഷിണാഫ്രിക്കയോടും തോറ്റതോടെ ഓസ്‌ട്രേലിയ വളരെ പിന്നോട്ട് പോകേണ്ടിവന്നുവെന്നും ഐസിസി വാര്‍ത്താക്കുറിപ്പില്‍ വിശദീകരിച്ചു.
ടി20യില്‍ ഓസ്‌ട്രേലിയ 278 പോയിന്റുകളുമായിട്ടാണ് ഒന്നാം സ്ഥാനം പിടിച്ചെടുത്തത്. തൊട്ടുതാഴെ രണ്ടാം സ്ഥാനത്തേക്ക് ന്യൂസിലാന്റിനെ പിന്നിലാക്കി ഇംഗ്ലണ്ട് 268 പോയിന്റുമായി കയറി. കിവികള്‍ക്ക് 260 പോയിന്റാണുള്ളത്. പാകിസ്താനേക്കാള്‍ ഒരു പടി കയറി 266 പോയിന്റുമായി മൂന്നാം സ്ഥാനത്ത് നിലയുറപ്പിച്ചു. പാകിസ്താന് നാലാം സ്ഥാനത്തേക്ക് വീണു.
