മുംബൈ: ഇന്ത്യയുടെ എക്കാലത്തേയും മികച്ച ടീം 1985ലേതെന്ന് പരിശീലകനും മുന്‍ നായകനുമായ രവിശാസ്ത്രി. ഇന്നത്തെ വിരാട് കോഹ്‌ലിയുടെ നിര അന്നത്തെ യുവനിരക്കെതിരെ പിടിച്ചുനില്‍ക്കില്ലെന്നും രവിശാസ്ത്രി വിലയിരുത്തുന്നു. 1983 ലെ ലോകകപ്പ് നേടിയ ടീമിനേക്കാള്‍ മികച്ചവരാണ് 1985ല്‍ ഇന്ത്യന്‍ നിരയിലുണ്ടായിരുന്നതെന്ന് രവിശാസ്ത്രി ഉറപ്പിച്ച് പറയുന്നു. ഇന്നത്തെ വിരാടിന്റ ടീമിന് പോലും അവരെ തോല്‍പ്പിക്കാന്‍ പ്രയാസപ്പെടേണ്ടിവരും.ഏറ്റവും പരിചയസമ്പന്നരും ഒപ്പം മികച്ച യുവതാരങ്ങളും ചേര്‍ന്ന ടീമായിരുന്നു തങ്ങളുടേയെന്നും രവിശാസ്ത്രി ഓര്‍ക്കുന്നു.
സുനില്‍ ഗവാസ്‌ക്കറിന്റെ കീഴിലെ 1985 ലെ ടീമാണ് വേള്‍ഡ് ചാമ്പ്യന്‍ഷിപ്പ് ഓഫ് ക്രിക്കറ്റ് കിരീടം ചൂടിയത്. ടൂര്‍ണ്ണമെന്റിലെ താരമായി മാറിയ രവിശാസ്ത്രിക്ക് സമ്മാനമായി ഓഡി കാര്‍ ലഭിച്ചതും അന്ന് വലിയ വാര്‍ത്തയായിരുന്നു.
‘ താനന്ന് 1983ലെ ലോകകപ്പ് നേടിയ ടീമിന്റേയും 1985 ലെ ടീമിന്റേയും ഭാഗമായിരുന്നു. എന്നാല്‍ 1983ലെ സുപ്രധാന താരങ്ങള്‍ക്കൊപ്പം ശിവരാമകൃഷ്ണന്‍, സദാനന്ദ് വിശ്വനാഥ്, അസ്ഹറുദ്ദീന്‍ എന്നിവരും ചേര്‍ന്നതോടെ അതിഗംഭീരമായ പോരാട്ടവീര്യമാണ് തങ്ങള്‍ക്കുണ്ടായത ്’ രവിശാസ്ത്രി പറഞ്ഞു.
