ന്യൂഡല്‍ഹി: അയല്‍രാജ്യങ്ങളുടെയെല്ലാം അതിര്‍ത്തി വിഷയത്തില്‍ ചൈനയുടെ നിലപാടില്‍ ധാരണയാകാതെ ഭൂട്ടാനും രംഗത്ത്. നിലവില്‍ ചൈനയുമായുള്ള അതിര്‍ത്തി വിഷയങ്ങള്‍ ചര്‍ച്ചയിലാണെന്നും അതിര്‍ത്തി പ്രത്യേകം തിരിച്ചിട്ടില്ലെന്നും ഭൂട്ടാന്റെ ഇന്ത്യയിലുള്ള സ്ഥാനപതി അറിയിച്ചു. ഭൂട്ടാന് അതിര്‍ത്തിയിലെ ശക്തമായ വനമേഖലയില്‍ കണ്ണുവച്ചുള്ള ചൈനയുടെ നീക്കമാണ് ഭൂട്ടാന് പ്രതിസന്ധിയാകുന്നത്. സാക് തേംഗ് വന്യജീവി സംരക്ഷണ കേന്ദ്രം കൈക്കലാക്കാനാണ് ചൈന നിലവില്‍ അവകാശ വാദം ഉന്നയിക്കുന്നത്. ഇതിനെ ഭൂട്ടാന് ശക്തമായി എതിര്‍ത്തിരിക്കുകയാണ്. ഭൂട്ടാനിലെ കിഴക്കന്‍ ജില്ലയായ താര്‍ഷിഗാംഗിന്റെ ഭാഗമാണ് വന്യജീവി കേന്ദ്രം.
ചൈനയുമായി 24 തവണ മന്ത്രിതല ചര്‍ച്ചകള്‍ നടന്നുകഴിഞ്ഞു. കൊറോണ കാരണമാണ് 25-ാംമത്തെ ചര്‍ച്ച നടക്കാന്‍ വൈകുന്നത്. ചൈന തര്‍ക്കമുന്നയിച്ച വിവിധ മേഖലക ളെപ്പറ്റിയാണ് അടുത്ത ഘട്ടത്തില്‍ സംസാരിക്കാന്‍ തീരുമാനിച്ചിരിക്കുന്നത്. ഇരുരാജ്യ ങ്ങള്‍ക്കും തൃപ്തികരമായ രീതിയില്‍ വിഷയം കൈകാര്യം ചെയ്യാനാകുമെന്നാണ് കരുതുന്നതെന്നും ഭൂട്ടാന് പ്രതിനിധി അറിയിച്ചു.
2017 ജൂണില്‍ ഭൂട്ടാന്റെ അതിര്‍ത്തിയായ ദോക്‌ലാം മേഖലയില്‍ ചൈന കടന്നുകയറി റോഡ് പണിയുന്നതുമായി ബന്ധപ്പെട്ട് തര്‍ക്കം ആരംഭിച്ചിരുന്നു. പ്രദേശത്ത് ഇന്ത്യയുടെ കൂടി സാന്നിദ്ധ്യമുള്ളതാണ് ഭൂട്ടാന് രക്ഷയായത്. അതിര്‍ത്തിയില്‍ അന്നു കയറിയതിന് ശക്തമായ തിരിച്ചടി ഇന്ത്യ ചൈനയ്‌ക്ക് നല്‍കിയിരുന്നു.
