കർക്കിടമാസത്തിൽ ദശപുഷ്പങ്ങൾക്കുള്ള പ്രാധാന്യം

മലയാള മാസങ്ങളിൽ ഒരുപാട് പ്രത്യേകതകൾ ഉള്ള മാസമാണ് കർക്കിടകം . തോരാതെ മഴ പെയ്തിരുന്നതിനാൽ പഞ്ഞ കർക്കിടകം എന്നും പഴമക്കാർ പറയുമായിരുന്നു . രാമായണമാസം കൂടിയായി ആചരിക്കുന്ന കർക്കിടകത്തിൽ ദശപുഷ്പത്തിന് വളരെയധികം പ്രാധാന്യമുണ്ട് .ഭക്തിസാന്ദ്രമാകുന്ന കർക്കിടമാസം , ആയുർവേദ ചികിത്സകൾക്ക് ഉത്തമമായ കാലംകൂടിയാണ് . ചികിത്സയുടെ ഭാഗമായും അല്ലാതെയും ആരോഗ്യ സംരക്ഷണത്തിനായി കഴിക്കുന്ന കർക്കിടക കഞ്ഞിയിൽ ഒഴിച്ച് കൂട്ടാനാവാത്ത ഒന്നാണ് ദശപുഷ്പകൂട്ട് .

ഹൈന്ദവസ്ത്രീകൾക്കിടയിൽ കർക്കിടകമാസത്തിൽ അനുഷ്ടിച്ചു പോരുന്ന ചില ആചാരങ്ങൾ നിലനിൽക്കുന്നുണ്ട്. മുക്കുറ്റിയുടെ ചാറ് കൊണ്ട് പൊട്ട് തൊടുക , മുടിക്കെട്ടിൽ ദശപുഷ്പം ചൂടുക തുടങ്ങിയവ ആചാരങ്ങളുടെ ഭാഗമായി ചെയ്യുന്നതാണെങ്കിലും ഇതിന്റെ പിന്നിൽ ചില ശാസ്ത്രീയ വശങ്ങളുണ്ട് . മംഗല്യവതികളായ സ്ത്രീകൾ , ഭർത്താക്കന്മാരുടെ ദീർഘായുസ്സിനും നന്മക്കും വേണ്ടിയാണ് ദശപുഷ്പം തലയിൽ ചൂടുന്നത്.

പേര് സൂചിപ്പിക്കുന്നത് പോലെ തന്നെ പത്തു പുഷ്പങ്ങൾ അടങ്ങുന്നതാണ് ദശപുഷ്പം. കറുക, കയ്യോന്നി , ഉഴിഞ്ഞ , ചെറൂള , നിലപ്പന , മുക്കുറ്റി , പൂവാംകുരുന്നില , തിരുതാളി , വിഷ്ണുക്രാന്തി , മുയൽച്ചെവിയൻ എന്നിവയാണ് ദശപുഷ്പങ്ങൾ . ഇതിൽ കറുക മാത്രം പുഷ്പിക്കാറില്ല .

കറുക

നിലം പറ്റി വളരുന്ന പുൽച്ചെടിയാണ് കറുക . ഗണപതിഹോമത്തിനും . മരണാന്തരചടങ്ങുകൾക്കും , മാലകെട്ടാനുമാണ് കറുക പൊതുവെ ഉപയോഗിക്കുക . കറുകയെ തണ്ടിന്റെ നിറവ്യത്യാസം അനുസരിച്ചു നീലക്കറുകയും വെള്ളക്കറുകയുമായി തരംതിരിക്കാം . ബുദ്ധിവികാസത്തിനും , നാഡീ സംബന്ധമായ രോഗങ്ങൾക്കും, ഓർമ്മശക്തിക്കും , മുലപ്പാൽ ഉണ്ടാകുന്നതിനും കറുകനീർ അത്യുത്തമമാണ് .

കയ്യോന്നി

സംസ്‌കൃതത്തിൽ കേശ വർദ്ധിനി എന്നറിയപ്പെടുന്ന കയ്യോന്നി , നനവുള്ള സ്ഥലങ്ങളിൽ തഴച്ചു വളരുന്ന സസ്യമാണ് . തലയിൽ തേക്കാനുള്ള എണ്ണ കാച്ചിയെടുക്കുമ്പോൾ അതിൽ കയ്യോന്നി കൂടി ചേർക്കുകയാണെങ്കിൽ മുടി തഴച്ചു വളരും. കാഴ്ചശക്തി വർധിക്കാനും, വാത കഫ രോഗങ്ങൾക്കും കയ്യോന്നി ഉത്തമ ഔഷധമാണ് .

ഉഴിഞ്ഞ

ഉഴിഞ്ഞ എന്ന സസ്യം ഇന്ദ്രവല്ലി , തേജസ്വിനി എന്നും അറിയപ്പെടുന്നു . ഈ സസ്യത്തിന്റെ ഇലകളാണ് മിക്കവാറും ഉപയോഗിക്കാറുള്ളത്. പനി , നീര് , വാതം , ചതവുകൾ , സ്ത്രീകളിലെ ആർത്തവ പ്രശ്നങ്ങൾ എന്നിവക്ക് ഫലപ്രദമായ ഔഷധമാണ് ഉഴിഞ്ഞ . ഉഴിഞ്ഞയിൽ ധാരാളം ആന്റിഓക്സിഡന്റുകൾ അടങ്ങിയിരിക്കുന്നതിനാൽ ഇവ രോഗപ്രതിരോധശേഷി വർധിപ്പിക്കുന്നതാണ് . ഉഴിഞ്ഞയില താളി പോലെ തന്നെ തലയിൽ തേച്ചു കുളിക്കാൻ ഉത്തമമാണ് .

ചെറൂള

സംസ്കൃതത്തിൽ ഭദ്ര, ഭദ്രിക എന്നും, മലയാളത്തിൽ ബലിപൂവ് എന്നും ചെറൂള അറിയപ്പെടുന്നു. കുറ്റിച്ചെടി പോലെ നിറയെ പടർന്നു നിൽക്കുന്ന സസ്യമാണ് ചെറൂള . കൂടുതലായും മരണാന്തരചടങ്ങുകൾക്കാണ് ചെറൂള ഉപയോഗിക്കാറ് . മൂത്രാശയ രോഗങ്ങൾ , മൂത്രത്തിൽ കല്ല് , രക്തസ്രാവം , കൃമിശല്യം എന്നിവയ്‌ക്ക് ഫലപ്രദമായ മരുന്നാണ് ചെറൂള .

നിലപ്പന

സംസ്കൃതത്തിൽ താലമൂലി എന്നറിയപ്പെടുന്ന നിലപ്പന , നിലംപറ്റി വളരുന്ന ചെറിയ പനയുടെ ആകൃതിയിൽ ഉള്ള ഒരു കുഞ്ഞൻ സസ്യമാണ്. നിലപ്പനയുടെ പ്രത്യേകതയെന്തെന്നുവെച്ചാൽ, ഈ സസ്യത്തിന്റെ ഇലയുടെ അഗ്രം തൊടുന്നിടത്തു നിന്ന് പുതിയവ കിളുത്തു വരും എന്നുള്ളതാണ് . വളരെയധിക ഔഷധമൂല്യമുള്ള സസ്യം കൂടിയാണ് നിലപ്പന . രക്തശുദ്ധി , അമിതരക്തസ്രാവം , മൂത്രം ചുടിച്ചിൽ , യോനീരോഗങ്ങൾ , ചുമ , മഞ്ഞപിത്തം , നീര് , വേദന എന്നിവയ്‌ക്ക് ഉത്തമമാണ് നിലപ്പന .

മുക്കുറ്റി

സംസ്കൃതത്തിൽ ജലപുഷ്പം എന്ന് നാമധേയമുള്ള സസ്യമാണ് മുക്കുറ്റി . സാധാരണയായി പറമ്പുകളിലും സുലഭമായി കാണുന്ന ഒന്നാണ് മുക്കുറ്റി . തൊടുമ്പോൾ ഇലകൾ വാടുന്ന സ്വഭാവം മുക്കുറ്റിക്കുണ്ട് . അണുനാശിനി സ്വഭാവമുള്ള മുക്കുറ്റി മുറിവുകളിൽ ചതച്ചു പുരട്ടുന്നത് ഉത്തമമാണ് . ചുമ , പനി , അതിസാരം , മൂത്രാശയ രോഗങ്ങൾ എന്നിവക്കും ഔഷധമായി മുക്കുറ്റി ഉപയോഗിക്കാറുണ്ട് . നല്ലൊരു വിഷഹാരി കൂടിയാണ് മുക്കുറ്റി . കടന്നൽ , പഴുതാര എന്നിവ കടിച്ചാൽ മുക്കുറ്റി അരച്ച് പുരട്ടുന്നതും , സേവിക്കുന്നതും നല്ലതാണ് . ഒരു പരിധി വരെ പ്രമേഹത്തെ നിയന്ത്രിക്കാനും മുക്കുറ്റിക്ക് കഴിയും .

പൂവാംകുരുന്നില

സഹദേവി എന്നും അറിയപ്പെടുന്ന പൂവാങ്കുരുന്നില വളരെയധികം ഔഷധഗുണമുള്ള സസ്യമാണ്. തൊടികളിലും മറ്റും വയലറ്റ് നിറമുള്ള പൂക്കളുമായി കാട്ടുചെടിപോലെ വളരുന്ന ഒന്നാണിത് . നാട്ടുവൈദ്യത്തിലും ആയുർവേദചികിത്സയിലും ഒരു പോലെ പ്രാധാന്യമുള്ള ഔഷധ സസ്യമാണ് പൂവാങ്കുരുന്നില . ആർത്തവ വിരാമമെടുത്ത സ്ത്രീകളിലെ ശരീരതാപത്തെ നിയന്ത്രിക്കാൻ പൂവാംകുരുന്നിലക്കു കഴിയും. കൂടാതെ രക്തശുദ്ധിക്കും , പനിക്കും , മൂത്രാശയ സംബന്ധമായ രോഗങ്ങൾക്കും , തലവേദന , നേത്രചികിത്സ എന്നിവക്കും പൂവാങ്കുരുന്നില ഗുണപ്രദമാണ് .

തിരുതാളി

ലക്ഷ്മണ എന്ന് സംസ്കൃതത്തിൽ അറിയപ്പെടുന്ന തിരുതാളി വള്ളിപ്പടർപ്പ് പോലെ വളരുന്ന സസ്യമാണ് . സ്ത്രീകളിൽ ഉണ്ടാകുന്ന വന്ധ്യതയ്‌ക്കും , ഗർഭപാത്ര സംബന്ധമായ അസുഖങ്ങൾക്കും തിരുതാളി നല്ലൊരു ഔഷധമാണ് .

വിഷ്ണുക്രാന്തി

ശംഖുപുഷ്‌പം , നീലപുഷ്പം എന്നറിയപ്പെടുന്ന വിഷ്ണുക്രാന്തി പരന്ന് കിടക്കുന്ന സസ്യമാണ് . ഓർമ്മക്കുറവ് , ഉറക്കമില്ലായ്മ , ശ്വാസതടസം , അപസ്മാരം , ദഹനപ്രശ്‌നങ്ങൾ എന്നിവയുടെ ചികിത്സക്കായി വിഷ്ണുക്രാന്തി ഉപയോഗിച്ച് വരുന്നു .

മുയൽച്ചെവിയൻ

കേരളത്തിൽ സർവ്വസാധാരണയായി കണ്ടു വരുന്ന ഔഷധസസ്യമാണ് മുയൽച്ചെവിയൻ . സംസ്കൃതത്തിൽ ശശശ്രുതി എന്നും അറിയപ്പെടുന്നു .ഇതിന്റെ ഇലകൾക്ക് മുയലിന്റെ ചെവിയോട് സാദൃശ്യമുള്ളതു കൊണ്ടാവാം ഈ സസ്യത്തിന് ഇങ്ങിനെ ഒരു നാമം ലഭിച്ചത്. ഏറെ ഔഷധഗുണമുള്ള മുയൽച്ചെവിയൻ തലവേദന , മൈഗ്രൈൻ , രക്തസ്രാവം , പനി , ഉദരസംബന്ധമായ രോഗങ്ങൾ , നേത്രരോഗങ്ങൾ എന്നിവക്കുള്ള ഉത്തമ ഔഷധമാണ് .

പുണ്യരാമായണ മാസത്തിൽ ദശപുഷ്പത്തെ അറിയുകയും , സ്ത്രീകൾ അവ തലയിൽ ചൂടുകയും ചെയ്താൽ സർവൈശ്വര്യവും , നെടുമംഗല്യവും ഫലം എന്ന് ശാസ്ത്രം .