ഉപ്പ് തിന്നവർ വെള്ളം കുടിക്കുമെന്നത് മലയാളത്തിലെ പ്രസിദ്ധമായ പഴഞ്ചൊല്ലുകളിൽ ഒന്നാണ്. കുറ്റം ചെയ്തവന് അതിന്റെ ശിക്ഷ ലഭിക്കുമെന്നുള്ള സാമാന്യ അർത്ഥമാണ് അവിടെ ഉദ്ദേശിക്കുന്നത്. മടിയിൽ കനമുള്ളവനേ വഴിയിൽ ഭയമുള്ളൂ എന്ന പഴഞ്ചൊല്ലും ഏതാണ്ട് ഇതേ വിഭാഗത്തിൽ പെട്ടതാണ്.
യഥാർത്ഥത്തിൽ എന്തുകൊണ്ടാണ് ഉപ്പ് തിന്നവൻ വെള്ളം കുടിക്കേണ്ടി വരുന്നത്. അതിന്റെ ശാസ്ത്രീയമായ വിശദീകരണങ്ങൾ പലതാണ്. വൃക്കകളിൽ സോഡിയം വെള്ളം അനുപാതം ക്രമമായി നിലനിർത്തേണ്ടതുള്ളതു കൊണ്ട് സോഡിയം കൂടുമ്പോൾ വൃക്കകൾ കൂടുതൽ ജലം വലിച്ചെടുക്കും. അങ്ങനെ വരുമ്പോൾ നമുക്ക് കൂടുതൽ വെള്ളം കുടിക്കേണ്ടി വരുമെന്നാണ് പഠനങ്ങൾ പറയുന്നത്.
അധികം ഉപ്പ് തിന്നുന്നത് ശരീരത്തിന് ഒട്ടും നല്ലതല്ല. ശരീരത്തിലെ രക്തസമ്മർദ്ദം ഉയരുന്നതോടെ അതിനനുസരിച്ചുള്ള മാറ്റങ്ങളും ഉണ്ടാകും.രക്തസമ്മർദ്ദം കൂടുന്നതോടെ അകാരണമായി ദേഷ്യം തുടങ്ങിയ സ്വഭാവങ്ങൾ ഉണ്ടാകാനും കാരണമാകും. കൈകാലുകളിൽ നീര് ഉണ്ടാകുന്ന എഡിമ എന്ന അവസ്ഥയും ഇതിന്റെ ഫലമായുണ്ടാകും. അതുകൊണ്ട് തന്നെ അമിതമായി ഉപ്പ് തിന്നാതിരിക്കുക. നിങ്ങളുടെ ശരീരത്തെയും മനസ്സിനേയും അത് ബാധിക്കും. അതായത് ഉപ്പ് തിന്നാൽ വെള്ളം കുടിക്കുക തന്നെ ചെയ്യും.
