പേൻ ഇല്ലാതാക്കാൻ അരമണിക്കൂർ

സ്ത്രീകളുടെയും അത് പോലെ തന്നെ അപൂർവ്വം ചില പുരുഷന്മാരുടെയും പ്രശ്നമാണ് മുടിയിലെ പേനും,  ഈരും. ഇവ രണ്ടും കൂടുതലായി കഴിഞ്ഞാൽ പിന്നെ ചൊറിച്ചിലും മാന്തലും ഒക്കെ ആയി അവസാനം ഭ്രാന്ത് പിടിക്കുന്ന അവസ്ഥയിലും ആകും. പേനിനെയും ഈരിനെയും കളയാൻ ഒട്ടനവധി ഷാംപൂകളും മരുന്നുകളും വിപണിയിൽ ലഭ്യമാണ്. മിക്കതിലും പലതരം കെമിക്കലുകളും അടങ്ങിയിട്ടുണ്ടാവും. അത്തരം കെമിക്കലുകൾ മുടിക്ക് ദോഷകരവും ആയേക്കാം. മുടിയ്‌ക്ക് ദോഷമല്ലാത്ത ഒരു വീട്ടുവൈദ്യം നോക്കാം. ഇനി ഈരിനെയും പേനിനെയും അരമണിക്കൂറിൽ കളയാം.

ഇതിന് പ്രധാനമായും വേണ്ടത് വിനാഗിരിയും ഉപ്പുമാണ്.

ആരോഗ്യത്തിനും മുടി സംരക്ഷണത്തിനും സഹായിക്കുന്ന ഒന്നാണ് വിനാഗിരി അഥവാ വിനിഗർ. പേനിനെയും ഈരിനെയും കളയുന്നതോടൊപ്പം മുടിയ്‌ക്ക് തിളക്കവും മിനുസവും നൽകുന്നു.

യാതൊരു ദോഷവുമില്ലാതെ ചർമ്മത്തിന് ആരോഗ്യപരമായ ഗുണങ്ങൾ നൽകുന്ന ഒന്നാണ് ഉപ്പ്. ഫംഗൽ ഇൻഫെക്ഷൻ, ചൊറിച്ചിൽ, അലർജി എന്നിവയ്‌ക്കുള്ള പരിഹാരമാണ് ഉപ്പ്. ബ്ലീച്ചിങ് ഇഫക്റ്റുള്ള ഉപ്പിന് പേനിനെയും ഈരിനെയും ഒഴിവാക്കാൻ സാധിക്കും.

അതിനായി നിങ്ങൾക്ക് വേണ്ടത് കുറച്ച് വെള്ളവും കുറച്ച് ഉപ്പും വിനാഗിരിയും പിന്നെ പഞ്ഞിയും. രണ്ട് ടേബിൾ സ്പൂൺ വെള്ളത്തിലേക്ക് ഒരു ടീസ്പൂൺ ഉപ്പ്, മുക്കാൽ ടീസ്പൂൺ  വിനാഗിരി എന്നിവ ചേർത്ത് ഇളക്കുക. ഇത് ഒരു പഞ്ഞി ഉപയോഗിച്ച് ശിരോചർമ്മം മുതൽ മുടിയുടെ അറ്റം വരെ പുരട്ടുക. മുടിയുടെ അറ്റം വരെ ഈരിനെ കാണാൻ സാധ്യതയുള്ളതിനാലാണ് മുടിയുടെ അറ്റം വരെ മിശ്രിതം പുരട്ടാൻ പറയുന്നത്. അര മണിക്കൂർ പുരട്ടി വെച്ചതിന് ശേഷം നല്ലത് പോലെ കഴുകുക. വേണമെങ്കിൽ മുടി കഴുകാൻ ഷാമ്പൂ ഉപയോഗിക്കാവുന്നതാണ്. ഒരു തവണ ഉപയോഗിച്ചാൽ തന്നെ പേനും ഈരും ചത്തുപോകും എന്ന് മനസിലാകും. വേണമെങ്കിൽ ആഴ്ചയിൽ രണ്ടോ മൂന്നോ ദിവസം അടുപ്പിച്ച് ഉപയോഗിക്കാവുന്നതാണ്.

പേനും ഈരും ഇല്ലാതിരിക്കാനുള്ള ഏറ്റവും പ്രധാന കാരണം മുടിയുടെ വൃത്തിയാണ്. ചെളിയും എണ്ണമെഴുക്കും ഇവയുടെ എണ്ണം വർധിക്കാൻ കാരണമാകും. മുടി കഴുകിയതിന് ശേഷം ഈർപ്പം കളഞ്ഞ് നല്ലത് പോലെ ഉണക്കുക. മുടിയുടെ ആരോഗ്യത്തിന് സഹായിക്കുന്ന ഭക്ഷണ വിഭവങ്ങൾ ശീലമാക്കുക.

പേനും ഈരും വരാതിരിക്കാൻ ശ്രമിക്കുന്നതോടൊപ്പം വന്നുകഴിഞ്ഞാൽ എത്രയും പെട്ടെന്ന് അവയെ നശിപ്പിക്കാനുള്ള ഇത്തരം രീതികളും നോക്കുക. വളരെ പെട്ടെന്ന് എണ്ണം കൂടാൻ സാധ്യതയുള്ളതാണ് പേനും ഈരും.