സാലഡ് വെള്ളരി കൊണ്ട് രുചിയേറും നാലുമണി പലഹാരം

സാലഡ് വെള്ളരികൊണ്ട് സാലഡ് ഉണ്ടാക്കാൻ മാത്രമല്ല രുചിയുള്ള നാലുമണി പലഹാരം ഉണ്ടാക്കാനും സാധിക്കും . ചായക്കോ കാപ്പിക്കോ ഒപ്പം വൈകുന്നേരങ്ങളിൽ എന്തെങ്കിലും കൊറിക്കാൻ കിട്ടുന്നത് സുഖമുള്ള കാര്യമാണ് . എണ്ണയിൽ പൊരിച്ച പലഹാരങ്ങൾ കഴിക്കും മുൻപ് നമ്മൾ ആരോഗ്യത്തെ കുറിച്ച് ഒന്ന് ചിന്തിക്കും . എന്നാൽ സാലഡ് വെള്ളരി കൊണ്ടുള്ള ഒന്നാകുമ്പോൾ ആരോഗ്യത്തെ കുറിച്ചുള്ള ആശങ്കയും ഒഴിവാക്കാം .

സാലഡ് വെള്ളരിയിൽ തൊണ്ണൂറ് ശതമാനം വെള്ളം അടങ്ങിയിരിക്കുന്നതിനാൽ ശരീരത്തിലെ ജലാംശം നിലനിർത്താൻ സഹായിക്കുകയും അതോടൊപ്പം തന്നെ ശരീരഭാരം കുറക്കാനും സഹായിക്കും .വ്യത്യസ്തമായ സാലഡ് വെള്ളരിക്കൊണ്ടുള്ള നാലുമണി പലഹാരം എങ്ങിനെ ഉണ്ടാക്കാം എന്ന് നോക്കാം

പലഹാരം ഉണ്ടാക്കാൻ വേണ്ടുന്ന സാധനങ്ങൾ : സാലഡ് വെള്ളരി , ഉരുളക്കിഴങ്ങ് , ബ്രെഡ് പൊടി , ചോളമാവ്‌ , വെളുത്തുള്ളി ഇഞ്ചി ചതച്ചത് , പച്ചമുളക് , ജീരക പൊടി , ചാറ്റ് മസാല , ഉപ്പ്

തയ്യാറാക്കുന്ന വിധം : ഉരുളകിഴങ്ങ് തൊലി കളഞ്ഞു വേവിച്ചതിന് ശേഷം പൊടിച്ചെടുക്കുക . ഇതിലേക്ക് തൊലി കളഞ്ഞു കുനുകുനെ അരിഞ്ഞ സാലഡ് വെള്ളരി ചേർക്കുക . വെള്ളരിയും ഉരുളക്കിഴങ്ങിനുമൊപ്പം ഉപ്പ് , ചതച്ചു വെച്ചിരിക്കുന്ന ഇഞ്ചി വെളുത്തുള്ളി, ചെറുതായി അരിഞ്ഞ പച്ചമുളക് , ജീരകപ്പൊടി , ചാറ്റ് മസാല എന്നിവ ചേർത്ത് ഇളക്കുക . ഈ മിശ്രിതത്തിലേക്ക് ചോളമാവ്‌ ചേർത്ത് നന്നായി കുഴച്ചു മാറ്റി വെക്കുക . അൽപ സമയം കഴിഞ്ഞു ഇതിൽ നിന്ന് ചെറിയ ഉരുളകളാക്കി കട്ലെറ്റിന്റെ രൂപത്തിൽ ആക്കിയതിനു ശേഷം , ബ്രെഡ് പൊടിയിൽ മുക്കി , എണ്ണയിലിട്ട് ചെറുതീയിൽ വറത്തു കോരുക .വ്യത്യസ്തമായ രുചിയുള്ള നാലു മണി പലഹാരം തയ്യാർ .

അല്പം സോസിനൊപ്പം വൈകുന്നേരം ചായയുടെയോ കാപ്പിയുടെയോ കൂടെ വിളമ്പാം ഈ ആരോഗ്യപ്രദമായ നാലു മണി പലഹാരം .