നാല് ലക്ഷം രൂപയുണ്ടെങ്കില് നിങ്ങള്ക്കൊരു കാര് വാങ്ങാം. അല്ലെങ്കില് നല്ലൊരു അവധിക്കാലത്തിനായി ഫണ്ട് ചെയ്യാം. അല്ലെങ്കില് ഒരു വീട്ടിലേക്ക് ആവശ്യമുള്ള ചെടികളെല്ലാം വാങ്ങാം. എന്നാല് ന്യൂസിലാന്റില്, വെറും നാല് ഇലകളുള്ള ഒരു ചെറിയ ചെടി വിറ്റു പോയത് നാല് ലക്ഷം രൂപയ്ക്കാണ്.
ഫിലോഡെന്ഡ്രോണ് മിനിമ എന്നറിയപ്പെടുന്ന അപൂര്വ നിറത്തിലുള്ള ചെടിക്കാണ് ഇത്രയും വില ലഭിച്ചത്. നാല് ഇലകളുടേയും വശങ്ങളിലായി മഞ്ഞ നിറവുമുണ്ടെന്നതാണ് ഇതിന്റെ ഒരു പ്രത്യേത. അസാധാരണമായ നിറം തന്നെയാണ് ന്യൂസിലാന്റിലെ ഏറ്റവും വലിയ വ്യാപാര സൈറ്റായ ട്രേഡ് മിയില് ഇതിന് ഇത്രയും ഡിമാന്റുണ്ടാകാനിടയായത്. ലേലത്തിലൂടെയാണ് ചെടി നാല് ലക്ഷം രൂപയ്ക്ക് വിറ്റുപോയത്. 80990 രൂപയായിരുന്നു ചെടിയുടെ വിലയായി ആദ്യം നല്കിയിരുന്നത്. എന്നാല് ആവശ്യക്കാരേറെയായതോടെയാണ് ഇത് ലേലത്തിലൂടെ നാല് ലക്ഷം രൂപയ്ക്ക് വിറ്റുപോയത്. പതിനായിരത്തിനടുത്ത് ആളുകള് കണ്ട ഈ പരസ്യം കണ്ടു കഴിഞ്ഞു. അപൂര്വങ്ങളില് അപൂര്വം എന്നാണ് മിക്കവരും ഇതിന് താഴെ കുറിച്ചത്.
‘ഈ ചെടിയില് നിലവില് 4 ഇലകളുണ്ട്, ഓരോ ഇലയിലും അതിശയകരമായ മഞ്ഞ നിറങ്ങളുണ്ട്!’ അപൂര്വമായ ചെടിയുടെ ചിത്രങ്ങള് പോസ്റ്റ് ചെയ്യുമ്പോള് വില്പ്പനക്കാരന് ട്രേഡ് മിയില് കുറിച്ചതിങ്ങനെയായിരുന്നു. പച്ചയും മഞ്ഞയും നിറത്തിലുള്ള ചെടിയുടെ ഫോട്ടോകള് പോസ്റ്റില് കാണാം.
മറ്റു ചെടികളെ അപേക്ഷിച്ച് ഇത്തരം വ്യത്യസ്ത നിറങ്ങളിലുള്ള ചെടികൾ അപൂര്വവും വളര്ച്ച കുറഞ്ഞതുമായിരിക്കുമെന്ന് സ്റ്റഫ് ന്യൂസിലാന്റ് വിശദീകരിക്കുന്നു. ഈ ചെടിക്ക് വേണ്ടി തുക ചെലവഴിക്കുന്ന വ്യക്തിക്ക് സസ്യങ്ങളെക്കുറിച്ച് വേണ്ടത്ര അറിവുണ്ടാകുമെന്ന് കരുതുന്നുവെന്ന് ന്യൂസിലന്റ് ഗാര്ഡനര് എഡിറ്റര് പറയുന്നു. പ്രത്യേക ശ്രദ്ധ ആവശ്യമാണ് ഈ ചെടിക്ക്. സാധാരണ ചുറ്റുപാടില് വളരുകയാണെങ്കില് ഇതിന്റെ മഞ്ഞയും പച്ചയും ചേര്ന്ന നിറം നഷ്ടപ്പെട്ടേക്കുമെന്നാണ് റിപ്പോര്ട്ടുകള്. അതേസമയം കൊവിഡ് വ്യാപനം വര്ദ്ധിച്ചതോടെ സസ്യങ്ങളുടെ വില്പ്പന കൂടിയെന്നാണ് യുഎസിലെ വില്പ്പനക്കാര് പറയുന്നത്.
