കൊറോണ വൈറസിനെ പ്രതിരോധിക്കാനുള്ള തീവ്ര ശ്രമത്തിലാണ് നാം. പ്രതിരോധ നടപടികളുടെ ഭാഗമായി മാസ്ക് ധരിക്കൽ നമ്മുടെ നിത്യജീവിതത്തിന്റെ ഭാഗമായി മാറിയിരിക്കുകയാണിപ്പോൾ. മാസ്ക് ധരിച്ചാണ് നാമെല്ലാവരും ഇപ്പോൾ പുറത്തു പോകുന്നത്. എന്നാൽ ചിലരെങ്കിലും മാസ്ക് ഉപയോഗിക്കാതെ പ്ലാസ്റ്റിക് ഫേസ്ഷീൽഡുകൾ ഉപയോഗിക്കാറുണ്ട്. പ്ലാസ്റ്റിക് ഫേസ്ഷീൽഡുകൾ കൊറോണ പകരുന്നത് തടയില്ലെന്നാണ് പുതിയ പഠനം അവകാശപ്പെടുന്നത്.
ജപ്പാനിലാണ് ഇത് സംബന്ധിച്ച പഠനം നടക്കുന്നത്. ജപ്പാനിലെ കോബിൽ ഒരു സർക്കാർ ഗവേഷണ കേന്ദ്രത്തിലുള്ള ഗവേഷകരാണ് പഠനത്തിന് നേതൃത്വം നൽകിയത്. റെസ്റ്റോറന്റ് പോലുള്ള തൊഴിൽ മേഖലകളിൽ ധാരാളം ആളുകൾ പ്ലാസ്റ്റിക് ഫേസ്ഷീൽഡുകൾ ഉപയോഗിച്ച് വരുന്നുണ്ട്. ഈ സാഹചര്യത്തിലാണ് ഫേസ്ഷീൽഡുകളുടെ പ്രയോജനം എത്രമാത്രമാണെന്ന് പരിശോധിക്കാൻ ഗവേഷകർ തീരുമാനിച്ചത്.
പ്ലാസ്റ്റിക് ഫേസ്ഷീൽഡ് ഉപയോഗിക്കുമ്പോൾ 5 മൈക്രോമീറ്ററിൽ താഴെ വലുപ്പം വരുന്ന സ്രവകണങ്ങൾ ഏകദേശം നൂറു ശതമാനവും വെളിയിലേക്ക് പോകുമെന്നാണ് പഠനം പറയുന്നത്. 50 മൈക്രോ മീറ്റർ വരെ വലുപ്പം വരുന്ന കണങ്ങളുടെ പകുതിയോളവും ഷീൽഡിന്റെ പുറത്തേക്ക് തെറിക്കുമെന്നും പഠനത്തിൽ ചൂണ്ടിക്കാട്ടുന്നു.
