മോര് കൊണ്ട് സാമ്പാർ

ദക്ഷിണേന്ത്യൻ പാചകരീതിയിൽ ഏറ്റവും പ്രിയപ്പെട്ട വിഭവങ്ങളിലൊന്നാണ് സാമ്പാർ. ഇഡ്‌ലിക്കും ദോശക്കുമൊപ്പം ചൂട് സാമ്പാർ , നല്ല കുത്തരി ചോറിനൊപ്പം സാമ്പാർ , ഇതൊക്കെ ആലോചിക്കുമ്പോൾ തന്നെ നല്ല കായത്തിന്റെ മണമുള്ള സാമ്പാർ വായിലൂടെ കപ്പലോടിക്കും . രുചിയിൽ വ്യത്യസ്തത ആഗ്രഹിക്കുന്നവർ സാമ്പാറിൽ പലതരത്തിലുള്ള പരീക്ഷണങ്ങളും നടത്താറുണ്ട് . അത് പോലെ തന്നെ വ്യത്യസ്തമായ ഒരു പാചകകുറിപ്പാണ് മോര് ഉപയോഗിച്ച് കൊണ്ടുണ്ടാക്കുന്ന സാമ്പാർ .

മോര് സാമ്പാറിന് വേണ്ടുന്ന ചേരുവകൾ

1 . 4 ടീസ്പൂൺ വെളിച്ചെണ്ണ
2 . ഒരു ടീസ്പൂൺ മഞ്ഞൾപൊടി
3 . ഒരു ടീസ്പൂൺ മുളകുപൊടി
4 . 200 ഗ്രാം അരിഞ്ഞ വെണ്ടക്ക
5 . ഉപ്പ് ആവശ്യത്തിന്
6 . 4 ടീസ്പൂൺ പുളിവെള്ളം
7 .വെള്ളം ആവശ്യത്തിന്
8 . അഞ്ച് ചെറിയ വഴുതന രണ്ടായി മുറിച്ചത്
9 . 2 ടീസ്പൂൺ ഉഴുന്ന് പരിപ്പ്
10 . 2 ടീസ്പൂൺ തുവര പരിപ്പ്
11 . അര ടീസ്പൂൺ ഉലുവ
12 . അര ടീസ്പൂൺ ജീരകം
13 . അര ടീസ്പൂൺ മല്ലി
14 . അര ടീസ്പൂൺ കുരുമുളക്
15 . 4 -5 വെളുത്തുള്ളി അല്ലി
16 . ഒരു കഷ്ണം ഇഞ്ചി
17 . അര കപ്പ് ചിരകിയ തേങ്ങ
18 . 200 എംൽ മോര്
19 . ഒരു ടീസ്പൂൺ കടുക്
20 . കറിവേപ്പില ആവശ്യത്തിന്
21 . സ്വല്പം ശർക്കര
22 . രണ്ടോ മൂന്നോ വറ്റൽ മുളക്

മോര് സാമ്പാർ ഉണ്ടാക്കുന്ന വിധം

1 . ഒരു പാത്രത്തിൽ അല്പം വെളിച്ചെണ്ണ , മഞ്ഞൾപൊടി ,മുളകുപൊടി എന്നിവ ചേർത്ത് വഴറ്റുക .

2 . ഇതിലേക്ക് അരിഞ്ഞു വെച്ചിരിക്കുന്ന വെണ്ടക്ക , അല്പം ഉപ്പ് , എടുത്തുവെച്ചിരിക്കുന്നതിൽ നിന്ന് ആവശ്യത്തിന് പുളിവെള്ളം , ആവശ്യത്തിന് വെള്ളം എന്നിവ ചേർത്ത് അഞ്ചു മിനിറ്റ് വേവിക്കുക .

3 . ഇതിലേക്ക് അരിഞ്ഞു വെച്ചിരിക്കുന്ന വഴുതന ചേർത്ത് പകുതി വേവാകുന്നത് വരെ വേവിച്ചതിന് ശേഷം അടുപ്പിൽ നിന്ന് വാങ്ങി മാറ്റി വെക്കുക .

4 . വേറെ ഒരു പാനിൽ ഉലുവ , ജീരകം , മല്ലി , ഉഴുന്ന് പരിപ്പ് , കുരുമുളക് , വെളുത്തുള്ളി , ഇഞ്ചി , തേങ്ങ , മഞ്ഞൾപൊടി , മുളകുപൊടി , ഉപ്പ് എന്നിവ ചേർത്ത് നന്നായി വറത്തെടുക്കുക .

5 . വറത്തെടുത്ത ചേരുവകൾ അല്പം വെള്ളം കൂട്ടി കുഴമ്പ് പരുവത്തിൽ അരച്ചെടുക്കുക .

6 . വേറെ ഒരു പാത്രത്തിൽ ആവശ്യത്തിന് വെളിച്ചെണ്ണ ഒഴിച്ച് ചൂടായതിന് ശേഷം വറതരച്ച ചേരുവകൾ ചേർത്ത് എണ്ണ തെളിയുന്ന വരെ ഇളക്കി കൊടുക്കുക .

7 . ഇതിലേക്ക് ബാക്കിയിരിക്കുന്ന പുളിവെള്ളവും , അല്പം ശർക്കരയും , ഉപ്പും ചേർക്കുക .

8 . ഇതിലേക്ക് മോര് അൽപ്പാൽപ്പമായി ചേർത്തിളക്കുക .

9 . മറ്റൊരു പാത്രത്തിൽ വേവിച്ചു വെച്ചിരിക്കുന്ന വെണ്ടക്ക വഴുതന കൂട്ട് ഇതിലേക്ക് ചേർത്ത് അടച്ചു വെച്ച് ചെറിയ തീയിൽ വേവിക്കുക .

10 . തിളച്ചു വരുമ്പോൾ , കടുക് താളിക്കുക .

വ്യത്യസ്തമായ മോര് കൊണ്ടുള്ള സാമ്പാർ തയ്യാർ .