മലയാള ചലച്ചിത്ര രംഗത്തെ ആക്ഷന്‍ സിനിമകളുടെ സംവിധായകന്‍ എന്നാണ് ഷാജി കൈലാസ അറിയപ്പെടുന്നത്. ആരാധകരുടെ പ്രിയപ്പെട്ട നടിയായ ആനിയാണ് ഷാജി കൈലാസിന്റെ ഭാര്യ. മൂന്ന് ആണ്‍കുട്ടികളാണ് ഇവര്‍ക്കുളളത്. ജഗന്‍ എന്നാണ് ഇവരുടെ മൂത്ത മകന്റെ പേര്. ഷാജി കൈലാസിന്റെ സൂപ്പര്‍ഹിറ്റ് ചിത്രമായ ആറാം തമ്പുരാനിലെ മോഹന്‍ലാല്‍ ചെയ്ത നായക കഥാപാത്രത്തിന്റെ പേരാണ് തന്റെ മകന് ഷാജി കൈലാസ് ഇട്ടിരിക്കുന്നത്. ഇതിനു പിന്നില്‍ ഒരു സംവിധായകനും ഭര്‍ത്താവുമായ ഷാജി കൈലാസിന്റെ മാനസിക സംഘര്‍ഷത്തിന്റെ ഒരു കഥയുണ്ട്.
മലയാളത്തിലെ എക്കാലത്തെയും പ്രിയപ്പെട്ട ചിത്രങ്ങളിലൊന്നാണ് ആറാം തമ്പുരാന്‍. ഈ ചിത്രത്തിലെ ഹരിമുരളീരവം എന്ന ഗാനം ജന മനസ്സുകളില്‍ ഇന്നും നിറഞ്ഞു നില്‍ക്കുന്ന ഒന്നാണ്. ചിത്രത്തിലെ പ്രധാന കഥാപാത്രമായ ജഗന്നാഥന്റെ ഭൂതകാലം എടുത്തു കാട്ടുന്ന ഗാനമായിരുന്നു അത്. ഹരിമുരളീരവം എന്ന ഗാന രംഗം ഷൂട്ട് ചെയ്യുന്നതിനായി മഹാബലിപുരത്ത് സെറ്റിട്ടു. ഗാന ചിത്രീകരണത്തിനുള്ള എല്ലാ തയാറെടുപ്പുകളും പൂര്‍ത്തിയായി ആ സമയത്താണ് ആനിയെ പ്രസവത്തിനായി ആശുപത്രിയില്‍ പ്രവേശിപ്പിച്ചിരിക്കുന്ന കാര്യം അറിയുന്നത്. ആനിയുടെ കടിഞ്ഞൂല്‍ പ്രസവമായിരുന്നു അത്. ഭര്‍ത്താവ് അടുത്തു വേണ്ട സമയം.
എന്നാല്‍ ഇപ്പുറം ചിത്രത്തിലെ പ്രധാന ഗാന രംഗത്തിന്റെ ചിത്രീകരണത്തിനുളള എല്ലാ തയ്യാറെടുപ്പുകളും പൂര്‍ത്തിയാവുകയും ചെയ്തു. എന്നാല്‍ ആ സമയം അപ്രതീക്ഷിതമായി മോഹന്‍ലാലിനെ കാണാന്‍ പ്രിയദര്‍ശന്‍ ലൊക്കേഷനില്‍ എത്തുകയും ഷാജി കൈലാസിന്റെ വിഷമം മനസ്സിലാക്കിയ പ്രിയദര്‍ശന്‍ നാട്ടിലേയ്‌ക്ക് പറഞ്ഞയക്കുകയും ഗാനരംഗം ചിത്രീകരിക്കുകയും ചെയ്തു. തന്റെ ആദ്യത്തെ കണ്‍മണിക്ക് ഷാജി കൈലാസ് ജഗന്‍ എന്നു പേരിട്ടു. 1997 ല്‍ പുറത്തിറങ്ങിയ ആറാം തമ്പുരാന്‍ എന്ന ചിത്രം ഇന്നും മലയാളികള്‍ അതേ സ്വീകാര്യതയോടു തന്നെ കാണുന്നു.
Comments