കാഠ്മണ്ഡു: ഇന്ത്യയും നേപ്പാളും തമ്മിലുള്ള വിദേശകാര്യ നയത്തില്‍ കൂടുതല്‍ വ്യക്തത വരുത്താന്‍ വിദേശകാര്യമന്ത്രാലയം. ഇന്ത്യന്‍ കരസേനാ മേധാവി എം.എം.നരവാനേയ്‌ക്ക് ഔദ്യോഗിക ബഹുമതി നല്‍കി നേപ്പാള്‍ ആദരിക്കും മുന്നേ ഇന്ത്യന്‍ അംബാസഡര്‍ നേപ്പാള്‍ ഭരണാധികാരികളുമായി കൂടിക്കാഴ്ച നടത്തി.
ഇന്ത്യയുടെ നേപ്പാളിലെ സ്ഥാനപതി വിനയ് മോഹന്‍ ഖ്വാത്രയാണ് നേപ്പാള്‍ വിദേശകാര്യ സെക്രട്ടറി ഭരത് രാജ് പൗദിയാലുമായി കൂടിക്കാഴ്ച നടത്തിയത്. വളരെ ഫലപ്രദവും ഉഷ്മളവുമായ കൂടിക്കാഴ്ചയാണ് നടന്നതെന്നും ഇന്ത്യാ നേപ്പാള്‍ ബന്ധത്തിന് കൂടുതല്‍ കരുത്തുപകരുന്ന നടപടികളുമായി മുന്നോട്ട് പോകുമെന്ന് ഇരുരാജ്യങ്ങളും തീരുമാനിച്ചതായും ഖ്വാത്ര പറഞ്ഞു.
ഇന്ത്യാ നേപ്പാള്‍ സൗഹൃദത്തില്‍ കരസേനാ ബന്ധം ഏറെ നിര്‍ണ്ണായകമാണെന്നത് എം.എം.നരവാനേയുടെ സന്ദര്‍ശനം സൂചിപ്പിക്കുന്നതായും ഖ്വാത്ര പറഞ്ഞു. മൂന്നു ദിവസത്തെ സന്ദര്‍ശനത്തിനായിട്ടാണ് കരസേനാ മേധാവി എത്തുന്നത്. നേപ്പാളിലെ സൈനിക മേധാവി പൂര്‍ണ്ണചന്ദ്ര ഥാപ്പ ജനറല്‍ നരവാനയെ സ്വീകരിക്കും.
