അന്തരീക്ഷത്തിലെ പൊടിയും അഴുക്കുകളും നമ്മുടെ ചർമ്മത്തെ വളരെ അധികം ദോഷകരമായി ബാധിക്കുന്നുണ്ട്. ചർമ്മ സംരക്ഷണത്തിനായി പല കെമിക്കൽ വസ്തുക്കളും പരീക്ഷിച്ച് പ്രത്യേകിച്ച് മാറ്റമൊന്നും ഇല്ലെങ്കിൽ വീടുകളിൽ ലഭ്യമായ ചില വസ്തുക്കൾ ഉപയോഗിച്ച് നമുക്ക് പുതിയ ചർമ്മ സംരക്ഷണ വസ്തുക്കൾ പരീക്ഷിക്കാം. ദോഷവശങ്ങൾ ഒന്നും തന്നെയില്ലാത്ത ചില വസ്തുക്കൾ ആണിവ.
മിക്ക വീടുകളിലും കണ്ട് വരുന്ന ഒന്നാണ് പനിനീര്. മുഖത്തെ ചർമ്മത്തിലെ സുഷിരങ്ങൾ വൃത്തിയാക്കാൻ ഏറ്റവും അനുയോജ്യമായ ഒന്നാണ് പനിനീര്. കോട്ടൺ തുണി പനിനീരിൽ മുക്കിയതിന് ശേഷം മുഖത്തും കഴുത്തിലും പയ്യെ തുടയ്‌ക്കുക. കണ്ണുകൾക്ക് സമീപം പനിനീര് ഉപയോഗിക്കാതിരിക്കുക. ശേഷം തണുത്ത വെള്ളം ഉപയോഗിച്ച് മുഖം കഴുകുക.
മുഖത്തെ കുരുക്കളുടെ പാടുകൾ ഇല്ലാതാക്കാൻ ഏറ്റവും അത്യാവശ്യമായ ഒന്നാണ് വിറ്റാമിൻ സി. ഇത് ഏറ്റവും കൂടുതൽ അടങ്ങിയിട്ടുള്ളത് നാരങ്ങയിലാണ്. ഇതിൽ അടങ്ങിയിരിക്കുന്ന സിട്രിക് ആസിഡ് മുഖത്തെ അഴുക്കുകൾ ഇല്ലാതാക്കാനും മുഖം തിളങ്ങാനും സഹായിക്കുന്നു. കൂടുതൽ ഫലപ്രദമായ മിശ്രിതത്തിന് വേണ്ടി 2 ടീസ്പൂൺ നാരങ്ങ നീരും അര ടീസ്പൂൺ പഞ്ചസാരയും ചേർത്ത് മുഖത്തും കഴുത്തിലും സ്‌ക്രബ് ചെയ്യുക. 10 മിനിറ്റിന് ശേഷം മുഖം കഴുകുക.
4 ടേബിൾ സ്പൂൺ കടലപ്പൊടി, അര ടീസ്പൂൺ മഞ്ഞൾപ്പൊടി, പാൽ എന്നിവ ചേർത്ത് ഒരു പേസ്റ്റ് ഉണ്ടാക്കുക. മുഖത്തും കഴുത്തിലും ഇത് പുരട്ടുക. 15 മിനിറ്റിന് ശേഷം ഇളം ചൂടുള്ള വെള്ളത്തിൽ കഴുകുക.
നേന്ത്രപ്പഴവും പാലും ഉപയോഗിച്ചുള്ള മിശ്രിതം ആണ് അടുത്തതായി പറയാൻ പോകുന്നത്. നേന്ത്രപ്പഴം ഉടച്ച് അതിൽ പാൽ ചേർത്ത് പേസ്റ്റ് രൂപത്തിൽ ആക്കുക. ഇത് മുഖത്തും കഴുത്തിലും പുരട്ടുക. ഉണങ്ങിയതിന് ശേഷം കഴുകി കളയുക. ചർമ്മത്തിലെ ഈർപ്പം നിലനിർത്താൻ ഈ ഫേസ് മാസ്‌ക് സഹായിക്കും.
ചർമ്മത്തിലെ ഈർപ്പം നിലനിർത്താൻ സഹായിക്കുന്ന മറ്റൊരു വസ്തു ആണ് കുക്കുമ്പർ. കുക്കുമ്പർ കട്ടി കുറഞ്ഞ് അരിഞ്ഞതിന് ശേഷം ഏകദേശം ഒരു മണിക്കൂർ നേരം ഫ്രിഡ്ജിൽ വെക്കുക. തുടർന്ന് ഇവ ചർമ്മത്തിന് മേൽ 15-20 മിനിറ്റ് നേരം വെക്കുക. ശേഷം തണുത്ത വെള്ളത്തിൽ മുഖം കഴുകുക. കണ്ണുകൾക്ക് ക്ഷീണം തോന്നുന്നുവെങ്കിൽ കണ്ണിന് മുകളിൽ കുക്കുമ്പർ വെക്കാവുന്നതാണ്.
