ഇസ്ലാമാബാദ് : ഇമ്രാന്‍ഖാന്‍ സര്‍ക്കാര്‍ രാജിവെയ്‌ക്കണമെന്നാവശ്യപ്പെട്ട് സമരം നടത്താനിരുന്നു പ്രതിപക്ഷപാര്‍ട്ടി അംഗങ്ങളെ അറസ്റ്റു ചെയ്ത് പോലീസ്. പ്രതിപക്ഷ പാര്‍ട്ടി നടത്താനിരുന്ന റാലിക്ക് മുന്നോടിയായി തന്നെ നൂറുകണക്കിന് പേരെ പോലീസ് അറസ്റ്റ് ചെയ്തു. സമാധാനപരമായ റാലിയാണ് പ്രതിപക്ഷ പാര്‍ട്ടി പദ്ധതിയിട്ടിരുന്നതെന്നും എന്നാല്‍ പാക് ഭരണകൂടം കിരാതമായി പ്രവര്‍ത്തിക്കുകയാണെന്നും പ്രതിപക്ഷം ആരോപിച്ചു.
ഇമ്രാന്‍ ഖാന്റെ ദുര്‍ഭരണത്തിനെതിരെ ഏറെ കാലമായി പാകിസ്താനില്‍ പ്രക്ഷോഭം നടന്നുകൊണ്ടിരിക്കുകയാണ്. മുന്‍ പ്രധാനമന്ത്രി യൂസഫ് റാസാ ഗിലാനിയുടെ മകന്‍ അലി മുസാന ഗിലാനിയുടെ നേതൃത്വത്തില്‍ നടത്താനിരുന്ന സമാധാന റാലിക്കിടെയാണ് പാക് പോലീസ് 370 ഓളം പേരെ അറസ്റ്റ് ചെയ്തത്. തുടര്‍ന്ന് പ്രദേശത്തെ മൊബൈല്‍ സേവനങ്ങള്‍ക്ക് വിലക്കേര്‍പ്പെടുത്തുകയും ചെയ്തു.
പ്രതിഷേധം നടത്താനിരുന്ന മൈതാനത്ത് ഷിപ്പിങ്ങ് കണ്ടൈനര്‍ ഉപയോഗിച്ച് തടഞ്ഞാണ് പ്രവര്‍ത്തകരെ അറസ്റ്റ് ചെയ്തത്. കാരണമില്ലാതെ പ്രവര്‍ത്തകരെ അറസ്റ്റു ചെയ്തതിനെതിരെ വ്യാപക പ്രതിഷേധമാണ് പാകിസ്താനില്‍ ഉയരുന്നത്. കൊറോണ വ്യാപനം തടയാനാണ് പ്രവര്‍ത്തകരെ തടഞ്ഞതെന്നാണ് ഇമ്രാന്‍ഖാന്‍ സര്‍ക്കാരിന്റെ വിശദീകരണം.
Comments