പാലക്കാട്: ജന്മനാ പോളിയോ രോഗം ബാധിച്ച് കൈകാലുകൾ തളർന്ന് ജീവിതം വീൽ ചെയറിലായ പാലക്കാട് എലപ്പുളി സ്വദേശി പ്രമോദിന് ഇലക്ട്രിക് വീൽ ചെയർ നല്കി നടൻ മോഹൻലാൽ. പ്രമോദിന് വീൽ ചെയർ ഇല്ലാതെ ദുരിതം അനുഭവിക്കുകയാണെന്ന വാർത്ത ജനം ടി.വി റിപ്പോർട്ട് ചെയ്തിരുന്നു. വാർത്ത ശ്രദ്ധയിൽപ്പെട്ടതോടെയാണ് പ്രമോദിന് സഹായവുമായി മോഹൻലാലും വിശ്വശാന്തി ഫൗണ്ടേഷനും രംഗത്തെത്തിയത്.
പ്രമോദ് പേപ്പർ പേനകൾ നിർമ്മിച്ച് ജീവിതത്തോട് പടപൊരുതുകയാണെന്ന വാർത്ത റിപ്പോർട്ട് ചെയ്യാനായാണ് ജനം ടിവി എലപ്പുള്ളിയിൽ എത്തിയത്. എന്നാൽ അന്ന് മനോഹരമായ പേനകൾ നിർമ്മിക്കുന്ന പ്രമോദിന് നല്ലൊരു വീൽചെയർ പോലും ഉണ്ടായിരുന്നില്ല. തുരുമ്പെടുത്ത് തകർന്ന ഒരു വീൽചെയർ ആയിരുന്നു അദ്ദേഹത്തിന്റെത്. പ്രമോദിന്റെ അധ്വാനവും,അതേസമയം പ്രയാസവും ജനം ടിവി റിപ്പോർട്ട് ചെയ്തു. വാർത്ത ശ്രദ്ധയിൽപ്പെട്ട നടൻ മോഹൻലാൽ പ്രമോദിനെ നേരിട്ട് കാണാനെത്തി . ഒരു ഇലക്ട്രിക് വീൽചെയറും പ്രമോദിന് സമ്മാനിച്ചു.
അട്ടപ്പാടി സ്വാമി വിവേകാനന്ദ മെഡിക്കൽ മിഷനിലെ ഡോക്ടർ നാരായണന്റെ നേതൃത്വത്തിലായിരുന്നു പ്രമോദിന് വീൽചെയർ കൈമാറിയത്. തന്റെ പ്രയാസമറിഞ്ഞ് പിന്തുണയുമായി രംഗത്തെത്തിയ ലാലേട്ടന് പ്രമോദും നന്ദിപറഞ്ഞു.
ലോക്ക് ഡൗൺ സമയത്ത് ഉൾപ്പെടെ നിർമ്മിച്ച പ്രമോദിന്റെ പേപ്പർ പേനകൾ മുഴുവനും താൻ വാങ്ങാം എന്ന ഉറപ്പു കൂടി നൽകിയ മോഹൻലാൽ, ഇത്തരത്തിൽ ദുരിതമനുഭവിക്കുന്നവർക്ക് തങ്ങളാൽ കഴിയുന്ന സഹായം വിശ്വശാന്തി ഫൗണ്ടേഷൻ നൽകുമെന്നും മോഹൻലാൽ പറഞ്ഞു.
Comments