ലോകത്തില്‍ തന്നെ ഏറ്റവും കൂടുതല്‍ ആളുകള്‍ ഉപയോഗിക്കുന്ന ഒരു മെസ്സേജിങ് ആപ്പ് ആണ് വാട്‌സ് ആപ്പ്. വ്യക്തിപരമായ ആവശ്യങ്ങള്‍ക്ക് വേണ്ടി ആണെങ്കിലും ജോലി സംബന്ധമായ ആവശ്യങ്ങള്‍ക്ക് വേണ്ടി ആണെങ്കിലും ഇന്ന് സമൂഹത്തില്‍ വാട്‌സ് ആപ്പിനുളള സ്ഥാനം വളരെ വലുതാണ്. എന്നാല്‍ വാട്‌സ് ആപ്പ് ഉപയോഗിക്കുന്ന ആളുകള്‍ ചില നിബന്ധനകള്‍ അംഗീകരിച്ചില്ല എങ്കില്‍ അടുത്ത മാസം മുതല്‍ വാട്‌സ് ആപ്പ് തുടര്‍ന്ന് ഉപയോഗിക്കാന്‍ കഴിയാതെ വരും. ഫേസ്ബുക്കിന്റെ ഉടമസ്ഥതയിലുള്ള മെസ്സേജിങ് ആപ്പായ വാട്‌സ് ആപ്പ് അവരുടെ സ്വകാര്യ നയങ്ങളും ഉപയോഗ നിബന്ധകളും എല്ലാം തന്നെ പരിഷ്‌കരിക്കുന്നത് സംബന്ധിച്ച് സന്ദേശങ്ങള്‍ ഉപഭോക്താക്കള്‍ക്ക് നല്‍കി തുടങ്ങി.
വാട്‌സ് ആപ്പിന്റെ മാതൃകാ കമ്പനിയായ ഫേസ്ബുക്കുമായി ചാറ്റ് വിവരങ്ങള്‍ പങ്കുവെക്കുന്നതിനുള്ള പരിഷ്‌കരണങ്ങളാണ് കമ്പനി പുതിയതായി കൊണ്ടു വന്നത്. ” വാട്‌സ് ആപ്പ് ഉപയോഗിക്കുന്നവരുടെ ഫോണ്‍ വിവരങ്ങളും സ്ഥല വിവരങ്ങളും ഞങ്ങള്‍ ശേഖരിക്കും. ഹാര്‍ഡ് വെയര്‍ മോഡല്‍, ഓപ്പറേറ്റിംഗ് സിസ്റ്റം വിവരങ്ങള്‍, ബാറ്ററി ചാര്‍ജ്, സിഗ്‌നല്‍ വിവരങ്ങള്‍, കണക്ഷന്‍ വിവരങ്ങള്‍, ഭാഷ, ഐ.പി വിലാസം തുടങ്ങിയ വിവരങ്ങള്‍ ഇതില്‍ ഉള്‍പ്പെടും ‘ ” എന്നാണ് കമ്പനി ഉപഭോക്താക്കള്‍ക്ക് നല്‍കുന്ന സന്ദേശം. ഫെബ്രുവരി എട്ട് മുതലാണ് പുതിയ നിബന്ധനകള്‍ നിലവില്‍ വരുന്നത്.
അവ അംഗീകരിച്ചാല്‍ മാത്രമേ വാട്‌സ് ആപ്പ് തുടര്‍ന്നും ഉപയോഗിക്കാന്‍ സാധിക്കുകയുള്ളൂ. അല്ലാത്ത പക്ഷം വാട്‌സ് ആപ്പ് ഉപയോഗിക്കാന്‍ കഴിയുന്നതല്ല. അതുകൊണ്ടു തന്നെ എല്ലാ ഉപഭോക്താക്കളും നിബന്ധനകള്‍ അംഗീകരിക്കേണ്ടത് ആവശ്യമാണ്. ഉപഭോക്താക്കള്‍ക്കു വേണ്ടി നിരവധി പുത്തന്‍ അപ്‌ഡേഷനുകള്‍ വാട്‌സ് ആപ്പ് കൊണ്ടു വരാറുണ്ട്. എന്നാല്‍ കമ്പനിയുടെ ഈ തീരുമാനത്തിനെതിരെ നിരവധി വിമര്‍ശനങ്ങള്‍ സാമൂഹിക മാദ്ധ്യമങ്ങളില്‍ വരുന്നുണ്ട്.
Comments