യൂറോ കപ്പിൽ ഡെൻമാർക്ക് സെമിയിൽ. ചെക് റിപ്പബ്ലിക്കിനെ ഒന്നിനെതിരേ രണ്ട് ഗോളുകൾക്ക് തകർത്താണ് വിജയം. തോമസ് ഡെലാനി, കാസ്പർ ഡോൾബെർഗ് എന്നിവരാണ് ഡെൻമാർക്കിന് വേണ്ടി ഗോളുകൾ നേടിയത്.
ഇംഗ്ലണ്ട് -യുക്രെയ്ൻ ക്വാർട്ടർ പോരാട്ടത്തിലെ വിജയികളെയാണ് സെമിയിൽ ഡെൻമാർക്ക് നേരിടുക. 29 വർഷങ്ങൾക്ക് ശേഷമാണ് ഡെൻമാർക്ക് യൂറോ കപ്പിന്റെ സെമിയിൽ എത്തുന്നത്. 1992 ൽ കിരീടവും ഡെൻമാർക്ക് നേടിയിരുന്നു.
മത്സരം തുടങ്ങി അഞ്ചാം മിനിറ്റിൽ തന്നെ ഡെൻമാർക്ക് മുൻതൂക്കം നേടിയിരുന്നു. സ്ട്രൈഗറിന്റെ കോർണർ കിക്ക് ഉന്നം തെറ്റാതെ വലയിലെത്തിച്ച് തോമസ് ഡെലാനിയാണ് ലീഡ് നൽകിയത്. തുടർന്ന് ചെക് മുന്നേറ്റ നിരയുടെ ആക്രമണങ്ങളെ ശക്തമായി ഡെൻമാർക്ക് പ്രതിരോധിക്കുന്നതാണ് കണ്ടത്. 42 ാം മിനിറ്റിൽ ഡെൻമാർക്ക് രണ്ടാം ഗോളും നേടി. 49 ാം മിനിറ്റിലാണ് പാട്രിക് ഷിക്കിലൂടെ ചെക് റിപ്പബ്ലിക് ആശ്വാസഗോൾ നേടിയത്.
