കണ്ണൂർ: മാനസയുടെ മൃതദേഹം കണ്ണൂരിലെത്തിച്ച ശേഷം കോതമംഗലത്തേയ്‌ക്ക് തിരിച്ച് പോകുകയായിരുന്ന ആംബുലൻസ് അപകടത്തിൽപ്പെട്ടു. മാഹി പാലത്തിന് സമീപം പരിമടത്ത് വെച്ചാണ് അപകടത്തിൽപ്പെട്ടത്. തലശ്ശേരി ഭാഗത്തേയ്‌ക്ക് വരികയായിരുന്ന ടാങ്കർ ലോറി ആംബുലൻസിൽ ഇടിയ്‌ക്കുകയായിരുന്നു.
പുലർച്ചെ മൂന്ന് മണിയോടെയാണ് അപകടം ഉണ്ടായത്. അപകടത്തിൽ ആംബുലൻസിലുണ്ടായിരുന്ന രണ്ട് ഡ്രൈവർമാർക്ക് പരിക്കേറ്റു. ഇരുവരേയും കണ്ണൂർ മിംസ് ആശുപത്രിയിൽ പ്രവേശിപ്പിച്ചു. എറണാകുളം പുന്നേക്കാട് സ്വദേശി എമിൽ മാത്യു, വട്ടംപാറ സ്വദേശി ബിട്ടു കുര്യൻ എന്നിവർക്കാണ് പരിക്കേറ്റത്.
കണ്ണൂരിലെ എകെജി ആശുപത്രിയിലേക്കാണ് മാനസയുടെ മൃതദേഹം എത്തിച്ചത്. അവിടെ നിന്ന് കണ്ണൂർ നാറാത്തുള്ള വീട്ടിലേക്ക് മൃതദേഹം എത്തിച്ചിട്ടുണ്ട്. പയ്യാമ്പലം ശ്മശാനത്തിൽ വെച്ചാണ് സംസ്‌കാരം നടക്കുന്നത്. രാഖിലിന്റെ മൃതദേഹവും മേലൂരിലെ വീട്ടിൽ എത്തിച്ചിട്ടുണ്ട്. തലശ്ശേരി ജനറൽ ആശുപത്രിയിലായിരുന്നു രാഖിലിന്റെ മൃതദേഹം സൂക്ഷിച്ചിരുന്നത്. പിണറായിയിലെ പൊതു ശ്മശാനത്തിലാണ് സംസ്‌കാരം.
