തിരുവനന്തപുരം: ഹിന്ദുമതത്തിൽനിന്ന് മതം മാറുന്നവർക്ക് സംവരണാനുകൂല്യങ്ങൾ നിഷേധിക്കുന്ന സുപ്രീം കോടതി വിധിക്കെതിരെ വിമർശനവുമായി സിപിഎം. മതപരിവർത്തനത്തിന് മുമ്പ് ലഭിച്ചിരുന്ന സംവരണാനുകൂല്യങ്ങൾ അതിനുശേഷവും തുടരാൻ വ്യക്തികൾക്ക് അവകാശം നൽകണമെന്നാണ് സിപിഎം പൊളിറ്റ് ബ്യൂറോയുടെ ആവശ്യം.
മതം മാറുന്നവർക്ക് സംവരണാനുകൂല്യങ്ങൾ നിഷേധിക്കുന്ന വിധികൾ സുപ്രീം കോടതി നേരത്തെയും പുറപ്പെടുവിച്ചിട്ടുണ്ടെന്ന് സിപിഎം ചൂണ്ടിക്കാട്ടി. ഇത്തരം വിധികൾ ഭരണഘടന വിഭാവനം ചെയ്യുന്ന തുല്യതയ്‌ക്കും സാമൂഹികനീതിക്കും വിരുദ്ധമാണെന്നാണ് പാർട്ടിയുടെ നിലപാട്.
മതം മാറിയെന്ന കാരണത്താൽ മാത്രം ദളിതർക്കും മറ്റ് പിന്നാക്കവിഭാഗങ്ങൾക്കും സംവരണാനുകൂല്യങ്ങൾ നിഷേധിക്കുന്നത് സാമൂഹികനീതിയുടെ ലക്ഷ്യങ്ങൾക്ക് വിരുദ്ധമാണെന്നാണ് പാർട്ടിയുടെ നിലപാട്.
ഭരണഘടനാ ഭേദഗതി വേണമെന്ന് കേന്ദ്രത്തോട്
ദളിതർക്കും മറ്റ് പിന്നാക്കവിഭാഗങ്ങൾക്കും അവരുടെ മതം പരിഗണിക്കാതെ സംവരണാനുകൂല്യങ്ങൾ ഉറപ്പാക്കാൻ കേന്ദ്രസർക്കാർ ആവശ്യമായ ഭരണഘടനാ ഭേദഗതി നടപടികൾ സ്വീകരിക്കണമെന്നും സിപിഎം ആവശ്യപ്പെട്ടു.
സംവരണത്തിന് കോടതി നിശ്ചയിച്ച 50 ശതമാനം പരിധി മാറ്റുന്നതിനാവശ്യമായ ഭരണഘടനാപരമായ നടപടികളിലേക്കും കേന്ദ്രസർക്കാർ നീങ്ങണമെന്നാണ് പാർട്ടിയുടെ മറ്റൊരു ആവശ്യം.
