കൊല്‍ക്കത്ത ദുരന്തം: ബംഗാളിലെ ഇന്നത്തെ പരിപാടികള്‍ മാറ്റിവെച്ച് അമിത് ഷാ; പരിക്കേറ്റവരെ ആശുപത്രിയില്‍ സന്ദര്‍ശിക്കും

ന്യൂഡല്‍ഹി: കൊല്‍ക്കത്തയിലെ ചോരേബാഗന്‍ ദുര്‍ഗാപൂജ പന്തലിലുണ്ടായ തിക്കിലും തിരക്കിലും നിരവധി പേര്‍ മരിച്ച സംഭവത്തില്‍ അനുശോചനം രേഖപ്പെടുത്തി കേന്ദ്ര ആഭ്യന്തരമന്ത്രി അമിത് ഷാ. ദുരന്തത്തിന്റെ പശ്ചാത്തലത്തില്‍ ഇന്ന് പശ്ചിമ ബംഗാളില്‍ നിശ്ചയിച്ചിരുന്ന എല്ലാ പരിപാടികളും മാറ്റിവെക്കുന്നതായി അദ്ദേഹം അറിയിച്ചു. പരിക്കേറ്റവരെ ആശുപത്രിയിലെത്തി സന്ദര്‍ശിക്കുമെന്നും വ്യക്തമാക്കി. സംഭവത്തില്‍ പശ്ചിമ ബംഗാള്‍ മുഖ്യമന്ത്രി സുവേന്ദു അധികാരിയുമായി അമിത് ഷാ ഫോണില്‍ സംസാരിച്ചു. മരിച്ചവരുടെ കുടുംബാംഗങ്ങളെ അദ്ദേഹം അനുശോചനം അറിയിച്ചു. പരിക്കേറ്റവര്‍ക്ക് മികച്ച ചികിത്സ ഉറപ്പാക്കാനുള്ള ക്രമീകരണങ്ങള്‍ ഭരണകൂടം ഒരുക്കുകയാണെന്നും അമിത് ഷാ വ്യക്തമാക്കി.

ശനിയാഴ്ച വൈകിട്ട് വടക്കന്‍ കൊല്‍ക്കത്തയിലെ ചോരേബാഗന്‍ സര്‍വജനീന്‍ ദുര്‍ഗാപൂജ പന്തലിലുണ്ടായ തിക്കിലും തിരക്കിലും 19 പേര്‍ മരിക്കുകയും 35 പേര്‍ക്ക് പരിക്കേല്‍ക്കുകയും ചെയ്തു. 18 പേരെ മരിച്ച നിലയിലാണ് ആശുപത്രിയിലെത്തിച്ചതെന്ന് മുഖ്യമന്ത്രി സുവേന്ദു അധികാരി അറിയിച്ചു. സംഭവത്തെ തുടര്‍ന്ന് അദ്ദേഹം കൊല്‍ക്കത്ത മെഡിക്കല്‍ കോളേജ് ആശുപത്രിയിലെത്തി പരിക്കേറ്റവരുടെ ചികിത്സാ വിവരങ്ങള്‍ വിലയിരുത്തി. ചോരേബാഗന്‍ ദുര്‍ഗാപൂജ സംഘാടകര്‍ നടത്തിയ ഒരു പ്രഖ്യാപനമാണ് സംഭവത്തിലേക്ക് നയിച്ചതെന്നാണ് മുഖ്യമന്ത്രി സുവേന്ദു അധികാരി പറഞ്ഞത്. ചിത്തരഞ്ജന്‍ അവന്യൂവിന് സമീപമുള്ള പന്തലില്‍ പ്രഖ്യാപനത്തെത്തുടര്‍ന്ന് ആളുകള്‍ കൂട്ടത്തോടെ നീങ്ങിയതോടെ ദുരന്തമുണ്ടായെന്നാണ് വിവരം.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

മഴ തുടങ്ങിയതോടെ പന്തലിന് പുറത്ത് കാത്തുനിന്നവര്‍ മുന്നിലേക്ക് തള്ളിക്കയറിയെന്നും ഇതിനിടെ ചിലര്‍ റോഡില്‍ വീണതോടെ തിക്കിലും തിരക്കിലും പെട്ട് അപകടമുണ്ടായെന്നും പൊലീസ് ഉദ്യോഗസ്ഥന്‍ പറഞ്ഞു. പരിക്കേറ്റവരെ പ്രവേശിപ്പിച്ച സര്‍ക്കാര്‍ ആശുപത്രിയില്‍ മുഖ്യമന്ത്രി സുവേന്ദു അധികാരിയും ചീഫ് സെക്രട്ടറി മനോജ് അഗര്‍വാളും സന്ദര്‍ശനം നടത്തി. ആരോഗ്യമന്ത്രി ശരദ്വത് മുഖര്‍ജിയും മുതിര്‍ന്ന ഉദ്യോഗസ്ഥരും ആശുപത്രിയിലെത്തി. ദുരന്തസ്ഥലത്ത് ദുരന്തനിവാരണ സേനാംഗങ്ങളെയും വിന്യസിച്ചിട്ടുണ്ട്. സംഭവത്തില്‍ മുന്‍ പശ്ചിമ ബംഗാള്‍ മുഖ്യമന്ത്രി മമത ബാനര്‍ജിയും ദുഃഖം രേഖപ്പെടുത്തി. പരിക്കേറ്റവര്‍ വേഗത്തില്‍ സുഖം പ്രാപിക്കട്ടെയെന്നും ദുരിതത്തിലായ കുടുംബങ്ങള്‍ക്ക് ഈ പ്രതിസന്ധി നേരിടാന്‍ ശക്തി ലഭിക്കട്ടെയെന്നും അവര്‍ ആശംസിച്ചു.