ന്യൂഡൽഹി: ഭീകരവിരുദ്ധ പോരാട്ടം ശക്തമാക്കി ജമ്മുകശ്മീർ പോലീസ്.കശ്മീർ താഴ്വര അശാന്തമാക്കുന്ന പത്ത് കൊടും ഭീകരരുടെ പട്ടികയാണ് പോലീസ് വകുപ്പ് പുറത്തുവിട്ടത്. കശ്മീർ ഐജി വിജയ് കുമാറാണ് ഭീകരരുടെ പട്ടിക ഔദ്യോഗികമായി പുറത്തുവിട്ടത്.
സലീം പാരേ,യൂസഫ് കാൺട്രൂ,അബ്ബാസ് ഷെയ്ഖ്,റയാസ് ഷെട്ടർഗണ്ട്,ഫാറൂഖ് നളി,സുബൈർവാനി,അഷ്റഫ് മൊൽവി എന്നിവരുൾപ്പെട്ട പത്തുപേരുടെ പട്ടികയാണ് പോലീസ് പുറത്തുവിട്ടത്. ട്വിറ്ററുൾപ്പെടെയുള്ള സാമൂഹ്യമാദ്ധ്യമങ്ങളിലും ഭീകരരുടെ വിവരങ്ങൾ പങ്കുവെച്ചിട്ടുണ്ട്. ഉമർ മുസ്താഖ്, ഖണ്ഡേ വക്കീൽ ഷാ എന്നിവർ പട്ടികയിലുൾപ്പെട്ട പുതിയ ആളുകളാണ്. ഇവർ ഈ അടുത്താണ് ഭീകരസംഘത്തിൽ ചേർന്നതെന്നും പോലീസ് സ്ഥിരീകരിച്ചു.
കശ്മീരിനെ ഭീകരമുക്തമാക്കാനുള്ള ശ്രമം പോലീസ് തുടരുകയാണ്.ഭീകര സംഘടനയിൽ ചേർന്ന പതിനാല് യുവാക്കളെ കഴിഞ്ഞ ദിവസം പോലീസ് കൗൺസിലിംഗിലൂടെ തിരിച്ചുകൊണ്ടുവന്നിരുന്നു. ആഴ്ചകളോളം നീണ്ട കൗൺസിലിംഗിനൊടുവിലാണ് യുവാക്കളെ ഭീകരപ്രവർത്തനത്തിൽ നിന്ന് പിന്തിരിപ്പിക്കാൻ സാധിച്ചത് എന്ന് അനന്ത് നാഗ് പോലീസ് മാദ്ധ്യമങ്ങളെ അറിയിച്ചിരുന്നു. രാജ്യത്തിന്റെ പുരോഗമനത്തിനായി പ്രവർത്തിക്കേണ്ട യുവാക്കൾ സമൂഹത്തിന്റെ സമ്പത്താണ്. ഇവർ ഭീകര പ്രവർത്തനങ്ങളിലേക്ക് വഴി തിരിഞ്ഞ് പോകാതിരിക്കാൻ ജാഗ്രത പുലർത്തണമെന്നും എസ്പി വ്യക്തമാക്കി.
