കർണാടക: ദേശീയ വിദ്യാഭ്യാസനയം നടപ്പാക്കുന്ന ആദ്യ സംസ്ഥാനമായി കൈയ്യടി നേടിയിരിക്കുകയാണ് കർണാടക. കേന്ദ്രസർക്കാർ ആവിഷ്കരിച്ച 2020 ദേശീയ വിദ്യാഭ്യാസനയമാണ് കർണാടക സർക്കാർ നടപ്പാക്കിയത്. സംസ്ഥാന ഉന്നത വിദ്യാഭ്യാസമന്ത്രി സിഎൻ അശ്വന്ത് നാരായൺ ആണ് ഇക്കാര്യം അറിയിച്ചത്. ഇത് സംബന്ധിച്ച് ഉത്തരവിറക്കുന്ന ആദ്യ സംസ്ഥാനമാണ് കർണാടക.
2020 ലെ പുതിയ വിദ്യാഭ്യാസനയം തീർച്ചയായും ഇന്ത്യൻ വിദ്യാഭ്യാസ ചരിത്രത്തിലെ നാഴികക്കല്ലാണെന്നും, ഒട്ടേറെ വിശാലമായ പഠനങ്ങൾക്കും കൂടിയാലോചനകൾക്കും ശേഷമാണ് സർക്കാർ ഇത് തീരുമാനിച്ചതെന്നും മന്ത്രി അറിച്ചു.
വിദ്യാലയങ്ങൾക്ക് പുറത്തുള്ള രണ്ടു കോടി കുട്ടികളെ വിദ്യാലയ സംവിധാനത്തിലേക്ക് കൊണ്ടുവരുകയും കൊഴിഞ്ഞുപോകൽ പരമാവധി കുറയ്ക്കുകയുമാണ് നയത്തിന്റെ ലക്ഷ്യം. സിലബസിന്റെ ഭാരം കുറയ്ക്കൽ, തൊഴിലധിഷ്ഠിത വിദ്യാഭ്യാസം, പരിസ്ഥിതിപഠനം എന്നിവയിൽ ശ്രദ്ധ കേന്ദ്രീകരിക്കുക തുടങ്ങിയ കാര്യങ്ങൾക്കാണ് നയം പ്രധാനമായും ഊന്നൽ നൽകിയിരിക്കുന്നത്. ഇതുവഴി വിദ്യാർത്ഥികൾക്ക് അവർ പഠിക്കാൻ ആഗ്രഹിക്കുന്ന വിഷയങ്ങൾ തെരഞ്ഞെടുക്കാനും അവസരവുമുണ്ടാകും. വിദ്യാർത്ഥിസമൂഹത്തെ കൂടുതൽ ശാക്തീകരിക്കാനും ഇതുവഴി സാധിക്കും. ഉന്നത വിദ്യാഭ്യാസ അഡീഷണൽ ചീഫ് സെക്രട്ടറി കുമാർ നായക് , കർണാടക ഉന്നത വിദ്യാഭ്യാസ കൗൺസിൽ വൈസ് ചെയർമാൻ തിമിഗൗഡ, മറ്റ് സീനിയർ ഓഫീസർമാർ തുടങ്ങിയവരുടെ നേതൃത്വത്തിലാണ് നയം നടപ്പിലാക്കുക.
ജൂലൈ 29ന് നടന്ന ദേശീയ വിദ്യാഭ്യാസനയത്തിന്റെ ഒന്നാം വാർഷികത്തോട് അനുബന്ധിച്ച് പ്രധാനമന്ത്രി നരേന്ദ്ര മോദി വിദ്യാർത്ഥികളുടെ പ്രകടനമികവ് മനസിലാക്കുന്ന സ്ട്രക്ചേർഡ് അസെസ്മെന്റ് ഫോർ അനലൈസിങ് ലേണിംഗ് (സഫൽ) രാജ്യത്തിന് സമർപ്പിച്ചിരുന്നു.
Comments