പെറ്റമ്മയെ വര്‍ഷങ്ങള്‍ക്കു ശേഷം തിരിച്ചു കിട്ടിയതിന്റെ സന്തോഷത്തിലാണ് അശ്വിന്. ജനിച്ച് ഒരു വര്‍ഷം കഴിയുമ്പോഴായിരുന്നു അശ്വിന്റെ മാതാപിതാക്കള്‍ വേര്‍പിരിഞ്ഞത്. പിന്നാലെ അച്ഛന്‍ ജീവനൊടുക്കി. ശേഷം അശ്വിനെ നോക്കി വളര്‍ത്തിയത് അച്ഛന്റെ അമ്മ വിശാലാക്ഷിയാണ്. കൂലിപ്പണിയെടുത്താണ് അവര്‍ അശ്വിനെ വളര്‍ത്തിയത്. പത്താം ക്ലാസില്‍ 70% മാര്‍ക്കോടെ ജയിച്ചപ്പോള്‍ വിതുര സ്‌കൂളില്‍ പ്ലസ്ടുവിന് പ്രവേശനം നേടി.
ഇതിനിടെ ആകെ തുണയായിരുന്ന വിശാലാക്ഷിയും മരിച്ചു. അതോടെ 16 വയസ്സില്‍ അനാഥനായി. ഇപ്പോള്‍, ഗോപിനാഥ് മുതുകാടിന്റെ മാജിക് പ്ലാനറ്റില്‍ ജോലി ചെയ്യുകയാണ് വിതുര സ്വദേശിയായ അശ്വിന്. .
മജീഷ്യനെ ആവശ്യമുണ്ടെന്ന പരസ്യം കണ്ടാണു അശ്വിന് മാജിക് പ്ലാനറ്റില്‍ എത്തിയത്. തുടര്‍ന്ന് വിവരം അറിയിക്കാമെന്നു പറഞ്ഞു അവര്‍ മടക്കിയെങ്കിലും അശ്വിന് പ്രതീക്ഷ കൈവിട്ടില്ല. ബീയര്‍ കുപ്പികള്‍ പെറുക്കി വിറ്റു കിട്ടിയ വരുമാനത്തിലായിരുന്നു പിന്നീട് അശ്വിന്റെ ജീവിതം. താമസസ്ഥലത്ത് ചിലര്‍ ഉപദ്രവിച്ചപ്പോള്‍ നിവൃത്തിയില്ലാതെ നാട്ടിലേക്കു മടങ്ങി. ആ നാളുകളിലാണ് മാജിക് പ്ലാനറ്റില്‍ നിന്നു വിളിയെത്തിയത്. 2016 ല്‍ അവിടെ ജോലിക്ക് കയറി. പിന്നീട് അമ്മയെ കണ്ടെത്താനായിരുന്നു അശ്വിന്റെ ശ്രമം. മണക്കാട് അമ്മയുടെ കുടുംബ വീടിന് അടുത്തുനിന്നു വരുന്ന, പ്ലാനറ്റിലെ ഫുഡ്കോര്‍ട്ട് ജീവനക്കാരിയുടെ അന്വേഷണത്തില്‍ അമ്മ ഏതോ അഗതി മന്ദിരത്തിലുണ്ടെന്ന വിവരം കിട്ടി.
നമ്പര്‍ തപ്പിയെടുത്ത് അശ്വിന് വിളിച്ചു. ഒടുവില്‍ ചിറയിന്‍കീഴ് അഗതി മന്ദിരത്തില്‍ 44 വയസ്സുകാരിയായ ലത ഉണ്ടെന്ന വിവരം കിട്ടിയതോടെ അവിടേക്ക് പാഞ്ഞെത്തി. അമ്മ എന്നെ തിരിച്ചറിഞ്ഞില്ല. എങ്കിലും പരാതിയില്ല. ഒന്നുമില്ലെങ്കിലും തിരിച്ചു കിട്ടിയില്ലോ. ഇനി അമ്മയ്‌ക്കൊപ്പം ജീവിക്കണം, നല്ല ചികിത്സ നല്‍കണം. അമ്മയെ അഗതി മന്ദിരത്തില്‍ നിന്നു കൂട്ടിക്കൊണ്ടു പോകണം’ അമ്മയെ 22 വര്‍ഷങ്ങള്‍ക്കു ശേഷം തിരിച്ചുകിട്ടിയ അശ്വിന്റെ വാക്കുകൾ. അമ്മയ്‌ക്കുമൊത്തുള്ള സന്തോഷ ജീവിതമാണ് ഇനി അശ്വിന്റെ സ്വപ്നം.
