മംഗളൂരുവിൽ ലാബ് ടെക്നീഷ്യന് നിപ്പ ലക്ഷണം ; കേരളത്തിൽ നിന്നെത്തുന്നവരെ നിരീക്ഷിക്കാൻ നിർദ്ദേശിച്ച് കർണാടക ആരോഗ്യവകുപ്പ്

ബംഗളൂരു : മംഗളൂരുവിൽ ഒരാൾക്ക് നിപ്പ രോഗലക്ഷണങ്ങൾ. സ്വകാര്യ ആശുപത്രിയിലെ ലാബ് ടെക്നീഷ്യനാണ് രോഗ ലക്ഷണം പ്രകടമായത്. ഇയാളുടെ സാമ്പിളുകൾ പരിശോധനയ്‌ക്കായി പൂനെ വൈറോളി ഇൻസ്റ്റിറ്റ്യൂട്ടിലേക്ക് അയച്ചു.

നിപ്പയുടെ എല്ലാ ലക്ഷണങ്ങളും ലാബ് ടെക്നീഷ്യൻ പ്രകടിപ്പിക്കുന്നുണ്ടെന്ന് കർണാടക ആരോഗ്യവകുപ്പ് അധികൃതർ അറിയിച്ചു. അടുത്തിടെ കേരളത്തിൽ നിന്നും എത്തിയ ആളുമായി ഇയാൾ സമ്പർക്കം പുലർത്തിയിരുന്നു. ഇതിന് ശേഷം ഗോവയിലേക്ക് സുഹൃത്തുക്കളുമൊത്ത് യാത്ര നടത്തുകയും ചെയ്തിരുന്നു. ഇതിന് പിന്നാലെയാണ് ലാബ് ടെക്നീഷ്യനിൽ നിപ്പ ലക്ഷണങ്ങൾ പ്രകടമായത്.

ഇയാളുടെ സമ്പർക്കപട്ടിക ആരോഗ്യവകുപ്പ് തയ്യാറാക്കി വരികയാണ്. കൂടുതൽ പേരിലേക്ക് രോഗം പകരാതിരിക്കാൻ ജാഗ്രതാ നിർദ്ദേശവും പുറപ്പെടുവിച്ചിട്ടുണ്ട്. കേരളത്തിൽ നിന്നും എത്തുന്നവരെ പ്രത്യേകം നിരീക്ഷിക്കാൻ മംഗളൂരുവിലെ ആരോഗ്യ പ്രവർത്തകർക്ക് അധികതർ നൽകിയിരിക്കുന്ന നിർദ്ദേശം.

അതിർത്തി മേഖലകളിൽ പരിശോധന കർശനമാക്കാനാണ് കർണാടകയുടെ തീരുമാനം. പനിയോ മറ്റ് രോഗലക്ഷണങ്ങളോ പ്രകടമാക്കുന്നവരെ പ്രത്യേകം പരിശോധിച്ച ശേഷം ആശുപത്രികളിലേക്ക് മാറ്റും.