മുംബൈ : ആഡംബര കപ്പലിലെ ലഹരി പാർട്ടിയുമായി ബന്ധപ്പെട്ട കേസിൽ പിടിയിലായ ഷാറൂഖ് ഖാന്റെ മകൻ ആര്യൻ ഖാന് ജയിൽ ഭക്ഷണം ഇഷ്ടപ്പെടുന്നില്ലെന്ന് റിപ്പോർട്ട്. എൻസിബി അറസ്റ്റ് ചെയ്ത് ജുഡീഷ്യൽ കസ്റ്റഡിയിൽ വിട്ട ആര്യൻ ഖാൻ ഇപ്പോൾ ആർതൂർ റോഡ് ജയിലിലാണ് ഉള്ളത്. എന്നാൽ ജയിലിലെ അന്തരീക്ഷവുമായി പൊരുത്തപ്പെട്ട് പോകാൻ ആര്യന് സാധിക്കുന്നില്ല എന്ന റിപ്പോർട്ടുകളാണ് പുറത്തുവന്നിരുന്നത്.
ജയിൽ കാന്റീനിൽ നിന്നുള്ള ബിസ്ക്കറ്റ് മാത്രമാണ് ആര്യൻ കഴിക്കുന്നത്. ജയിലിലേക്ക് പോകുമ്പോൾ 12 ബോട്ടിൽ വെള്ളം ആര്യൻ കൊണ്ടുപോയിരുന്നു. അത് മാത്രമാണ് ആര്യൻ ഖാൻ കുടിക്കുന്നതും. എന്നാൽ ആര്യന്റെ പക്കലുള്ള വെള്ളം തീരാറായി എന്നും റിപ്പോർട്ട് വ്യക്തമാക്കുന്നു.
ആർതൂർ ജയിലിലെ തടവുപുള്ളികൾക്ക് കൃത്യമായ ഭക്ഷണ രീതിയാണ് ഉള്ളത്. രാവിലെ ഷീര പോഹ, ഉച്ചയ്ക്കും രാത്രിയിലുമായി ചപ്പാത്തി, സബ്ജി, ദാൽ, ചോറ് എന്നീ വിഭവങ്ങളാണ് നൽകുന്നത്. എന്നാൽ താരപുത്രന് ഇതൊന്നും തന്നെ ഇഷ്ടപ്പെടുന്നില്ലെന്നാണ് റിപ്പോർട്ട്.
പുറത്ത് നിന്നുള്ള ഭക്ഷണം ജയിലിൽ അനുവദിക്കാറില്ല. ഈ ആവശ്യവുമായി ആര്യന്റെ അമ്മ ഗൗരി ഖാൻ നേരത്തെ അധികൃതരെ സമീപിച്ചിരുന്നു. വീട്ടിലുണ്ടാക്കിയ ഭക്ഷണം ആര്യന് കൊടുക്കാൻ അനുവദിക്കണം എന്നതായിരുന്നു ആവശ്യം. എന്നാൽ ജയിൽ അധികൃതർ അതിന് അനുവദിച്ചില്ല. ആര്യൻ എൻസിബി കസ്റ്റഡിയിലിരിക്കെ മക് ഡോണാൾഡ്സിൽ നിന്നുള്ള ഭക്ഷണവുമായി ഗൗരി ഖാൻ ഓഫീസിലെത്തിയെങ്കിലും ഉദ്യോഗസ്ഥർ ഗൗരിയെ തിരികെ അയച്ചത് മാദ്ധ്യമങ്ങളിൽ വാർത്തയായിരുന്നു.
അതേസമയം ആര്യന്റെ ജയിൽ ജീവിതം ഷാറൂഖിനെയും അമ്മ ഗൗരി ഖാനെയും ദുഃഖത്തിലാക്കിയിരിക്കുകയാണ്. മുംബൈയിലെ മന്നത് ബംഗ്ലാവിൽ നിന്ന് അവർ പുറത്തിറങ്ങിയിട്ടില്ല എന്നതും ശ്രദ്ധേയമാണ്.
