കടന്നൽ കൂടിനെ പരുന്ത് ആക്രമിച്ചു; കുത്തേറ്റ എക്‌സൈസ് ഡ്രൈവർ മരിച്ചു

കോഴിക്കോട്: കടന്നൽ കുത്തേറ്റ് എക്‌സൈസ് ഡ്രൈവർ മരിച്ചു. ജോയിന്റ് എക്‌സൈസ് കമ്മീഷണർ ഓഫീസിലെ ഡ്രൈവർ പാറക്കണ്ടിയിൽ സുധീഷ് ആണ് മരിച്ചത്. കോഴിക്കോട് ചാത്തമംഗലം നെച്ചൂളിയിൽ പറമ്പിലെ ജോലിക്കിടയിൽ കടന്നൽ കുത്തേൽക്കുകയായിരുന്നു. മെഡിക്കൽ കോളേജ് ആശുപത്രിയിൽ വച്ച് ഇന്ന് പുലർച്ചെയായിരുന്നു മരണം.

തീവ്രപരിചരണ വിഭാഗത്തിൽ ചികിത്സയിലായിരുന്നു. വീട്ടുവളപ്പിൽ ജോലി ചെയ്തിരുന്ന രാമചന്ദ്രൻ എന്നയാൾക്കും കുത്തേറ്റിരുന്നു. പ്ലാവിന് മുകളിലുണ്ടായിരുന്ന കടന്നൽ കൂടിനെ പരുന്ത് ആക്രമിച്ചതോടെ കടന്നലുകൾ ഇളകുകയായിരുന്നു. പിന്നാലെ രാമചന്ദ്രനെ രക്ഷിക്കാനെത്തിയ സുധീഷിനെ കടന്നൽ കൂട്ടമായി ആക്രമിച്ചു. രാമചന്ദ്രനും ചികിത്സയിലാണ്.