മനുഷ്യമനസ്സുകളിലെ അന്ധകാരത്തെ അകറ്റി വെളിച്ചം കൊണ്ടുവരുക എന്ന സന്ദേശം നൽകുന്ന ദീപാവലി. അജ്ഞാനത്തിൽ നിന്ന് ജ്ഞാനപ്രകാശത്തിലേക്ക്,അധർമ്മത്തിൽ നിന്ന് ധർമ്മത്തിലേക്ക് എന്നതിന്റെയൊക്കെ പ്രതീകമായി ദീപങ്ങൾ നിറയുന്ന ത്രിസന്ധ്യ… തിൻമയ്ക്ക് മേൽ നൻമ നേടിയ വിജയത്തെയും ദീപാവലിയായി ആഘോഷിക്കുന്നു..
അതുകൊണ്ടുതന്നെ ദീപങ്ങളുടെ ഉത്സവമായ ദീപാവലി എന്നും വിശേഷിപ്പിക്കാം. പടക്കം പൊട്ടിച്ചും, ദീപം തെളിച്ചും, മധുരം നൽകിയും ദീപാവലി ആഘോഷത്തിന്റെ നിറവിലാകുന്ന നാടും നഗരവും. ആശ്വനി മാസത്തിലെ കൃഷ്ണപക്ഷ(കറുത്തവാവിലെ)ചതുർദ്ദശിയാണ് ദീപാവലിയായി ഭാരതത്തിലാഘോഷിക്കുന്നത്.
മലയാളത്തിലത് തുലാമാസത്തിലാഘോഷിക്കുന്നു. പുരാണത്തിൽ ശ്രീരാമൻ തന്റെ പതിനാല് വർഷത്തെ വനവാസത്തിന് ശേഷം അയോധ്യാപുരിയിലേക്ക് വന്ന പുണ്യദിനം.ലക്ഷദീപങ്ങളാൽ ജനങ്ങൾ സ്വന്തം രാമനെ ആനയിച്ചു. ധർമ്മവിജയം നേടിയ ശ്രീരാമചന്ദ്രൻ അയോധ്യാവാസിയായി വീണ്ടും മനസ്സിലേക്ക് പ്രതിഷ്ഠിക്കപ്പെട്ട ദിവസം.അഹങ്കാരിയും ക്രൂരനുമായ നരകാസുരനെ ഭഗവാൻ ശ്രീകൃഷ്ണൻ നിഗ്രഹിച്ചു എന്നതാണ് ദീപാവലിയുമായി ബന്ധപ്പെട്ടുള്ള മറ്റൊരു വിശ്വാസം.
എല്ലാം ധാർമ്മികവിജയത്തിന്റെ സന്ദേശമാണ് നൽകുന്നത്.ദീപാവലി ദിനത്തിൽ വൈകുന്നേരം യമധർമ രാജന് വേണ്ടി ദീപദാനം നടത്തുന്ന പതിവും ഭാരതത്തിൽ ചിലയിടത്തും നിലവിലുണ്ട്. എണ്ണ തേച്ച് കുളി, കോടി വസ്ത്രങ്ങൾ ധരിക്കൽ, മധുര പലഹാരങ്ങൾ വിതരണം ചെയ്യൽ, പടക്കം പൊട്ടിക്കൽ എന്നിവയെല്ലാം ദീപാവലി ആഘോഷത്തിന്റെ ഭാഗമാണ്. രാത്രിയെ പകലാക്കി ആകാശത്ത് വർണ്ണങ്ങൾ നിറയുന്ന ദീപാവലി ഉത്സവം തലേദിവസം രാത്രി മുതൽ ആരംഭിക്കും.
ഉത്തരേന്ത്യയിലാണ്് ദീപാവലി ആഘോഷങ്ങൾ പ്രധാനമായും കൊണ്ടാടാറുള്ളത്.ഇന്ന് ആഗോളതലത്തിൽ ആഘോഷങ്ങളെല്ലാം സ്വീകരിക്കപ്പെട്ടുതുടങ്ങിയിരിക്കുന്നു. ഒത്തുകൂടാൻ കിട്ടുന്ന അവസരങ്ങൾ മനോഹരമാക്കുന്നതിൽ ദീപാവലിക്കുള്ളത് നക്ഷത്രശോഭയാണ്. പടക്കങ്ങളും മാനത്ത് വർണ്ണചിത്രംവരയ്ക്കുന്ന പൂത്തിരികളും നിറയുന്ന ആഗോളതല ഘോഷങ്ങളാണ് നടക്കുന്നത്.
ഭാരതത്തിന്റെ സാംസാകാരിക പൈതൃകം കാത്തുസൂക്ഷിക്കുന്ന നേപ്പാളും ശ്രീലങ്കയും രാമായണത്തിന്റെ ഭാഗമായിത്തന്നെ ദീപാവലിയെ കാണുന്നു എന്ന പ്രത്യേകതയുമുണ്ട്. ജൈനമതവിശ്വാസപ്രകാരം തീർത്ഥങ്കര സംസ്കാരത്തിന് തുടക്കമിട്ട മഹാവീരന്റെ മോക്ഷപ്രാപ്തിനടന്നത് ഈ ദിനത്തിലാണ്.സിഖ്മതത്തെ സംബന്ധിച്ച് 1577ൽ പഞ്ചാബിലെ അമൃതസർ സുവർണ്ണക്ഷേത്രത്തിന്റെ ശിലാന്യാസം നടന്നത് ഈ ദിവസമാണ്.
പൊതുസമൂഹത്തിൽ ദീപപ്രഭപോലെ ഐശ്വര്യം നിറയുന്ന ദീപാവലിനാളുകളിലാണ് മധുരപലഹാരങ്ങളുടേയും വസ്ത്രങ്ങളുടേയും സ്വർണ്ണത്തിന്റെയും കച്ചവടം പൊടിപൊടിക്കുന്നത്. ഇന്ന് ഇന്ത്യയിലെ ഒട്ടുമിക്കസംസ്ഥാനത്തും എല്ലാഭാഷക്കാരും വന്നു താമസിക്കുന്നതിനാൽ ദീപാവലി യഥാർത്ഥത്തിൽ ഭാരതത്തെ ഒന്നിപ്പിക്കുകയാണ്. ഒരുദീപം വഴി അനേകം ദീപങ്ങൾ ജ്വലിക്കുകയാണ്.
