കരുത്ത് തെളിയിച്ച് മഹീന്ദ്ര; ക്രാഷ് ടെസ്റ്റിൽ ഫുൾ മാർക്ക് നേടി എക്‌സ് യുവി700

മുംബൈ: സുരക്ഷയുടെ കാര്യത്തിൽ മികച്ച പ്രകടനം കാഴ്ചവെച്ചിരിക്കുകയാണ് മഹീന്ദ്ര ഈയിടെ പുറത്തിറക്കിയ എക്‌സ് യുവി700. ഗ്ലോബൽ എൻസിഎപിയുടെ ക്രാഷ് ടെസ്റ്റിൽ മുതിർന്നവരുടെ സുരക്ഷയിൽ 5-സ്റ്റാറും, കുട്ടികളുടെ സുരക്ഷിൽ 4-സ്റ്റാർ റേറ്റിംഗും നേടി കരുത്ത് തെളിയിച്ചിരിക്കുകയാണ് വാഹനം. വാഹനത്തിന്റെ ഏറ്റവും പ്രധാനപ്പെട്ട അടിസ്ഥാന സുരക്ഷ സൗകര്യങ്ങളായ രണ്ട് എയർബാഗുകളും, എബിഎസ് ബ്രേക്കിംഗ് സിസ്റ്റവും, ഐഎസ്ഒഫിക്‌സ് ആങ്കറേജുകളും ക്രാഷ് ടെസ്റ്റിംഗിന് വിധേയമാക്കിയിരുന്നു.

‘ മുതിർന്നവരുടെ സുരക്ഷയിൽ മികച്ച പ്രകടനം കാഴ്ചവെച്ചതിലൂടെ മഹീന്ദ്ര വാഹന വിപണിയിൽ ഒരു പ്രധാന നാഴികകല്ല് കൈവരിച്ചിരിക്കുകയാണ്. കൂടാതെ ഓട്ടോണമസ് എമർജൻസി ബ്രേക്കിംഗ്(എബിഎസ്) വാഗ്ദാനം ചെയ്യുന്ന ആദ്യ ഇന്ത്യൻ നിർമ്മിത വാഹനമായി മാറിയിരിക്കുകയാണ് എക്‌സ് യുവി700. യാത്രക്കാരുടെ സുരക്ഷയിൽ യാതൊരു വിട്ടുവീഴ്ചയും ചെയ്യാതെ ആഗോളതലത്തിൽ വൻ ജനശ്രദ്ധ നേടാൻ വാഹനത്തിനാകും’ ഗ്ലോബൽ എൻസിഎപി സെക്രട്ടറി ജനറൽ അലജാൻഡ്രോ ഫ്യൂറസ് പറഞ്ഞു.

ഡ്രൈവർക്കും കൂടെ ഇരിക്കുന്ന യാത്രക്കാരനും കഴുത്തിനും തലയ്‌ക്കും, നെഞ്ചിനും മികച്ച സുരക്ഷ എക്‌സ് യുവി700 നൽകുന്നുണ്ട്. ഇരു യാത്രക്കാരുടേയും കാൽമുട്ടുകൾക്കും നല്ല സുരക്ഷ വാഹനം നൽകുന്നു. വാഹനത്തിന്റെ ബോഡിയും ഫൂട്ട് വെൽ ഏരിയയും ഇടിയുടെ ആഘാതത്തെ പ്രതിരോധിച്ചു കൊണ്ട് സ്ഥിരത നൽകുന്നു. എക്‌സ് യുവി700ൽ ഘടിപ്പിച്ചിരിക്കുന്ന സീറ്റ് ബെൽറ്റ് സംവിധാനവും മികച്ചതാണെന്ന് ടെസ്റ്റിൽ തെളിഞ്ഞു. എല്ലാ സുരക്ഷ ക്രമീകരണങ്ങളും മികച്ചതാണെന്ന് തെളിയിക്കപ്പെട്ടതിനാൽ മുതിർന്നവരുടെ സുരക്ഷയിൽ 5-സ്റ്റാറാണ് വാഹനം കരസ്ഥമാക്കിയത്.

1.5 വയസ്സിനും 3 വയസ്സിനും ഇടയിൽ പ്രായമുള്ള കുട്ടികളുടെ ചൈൽഡ് സീറ്റ്, ഐഎസ്ഒഫിക്‌സ് ആങ്കറേജുകളും സപ്പോർട്ട് ലെഗും ഉപയോഗിച്ച് പിൻവശത്തേക്ക് അഭിമുഖമായി ഇൻസ്റ്റാൾ ചെയ്തിട്ടുണ്ട്. ഇടിയുടെ ആഘാതത്തിൽ തലയ്‌ക്കേൽക്കുന്ന പരിക്കുകൾ തടയാൻ ഇതിലൂടെ സാധിക്കും. ചൈൽഡ് റെസ്ട്രെയിന്റ് സിസ്റ്റം (സിആർഎസ്) നല്ല പ്രകടനം കാഴ്ചവെച്ചു. എന്നാലും ചില സുരക്ഷ ക്രമീകരണങ്ങൾ മെച്ചപ്പെടുത്തേണ്ടതു കൊണ്ട് കുട്ടികളുടെ സുരക്ഷയിൽ 4-സ്റ്റാറാണ് എക്‌സ് യുവി700 നേടിയത്.