തിരുവനന്തപുരം: വിമാത്താവളം ഏറ്റെടുത്ത അദാനി ഗ്രൂപ്പ് തിരുവനന്തപുരത്ത് പുതിയ പരിഷ്കാരങ്ങൾ നടപ്പിലാക്കി കൂടുതൽ ജനപ്രിയമാകുന്നു. സേവനങ്ങൾക്ക് ചെലവ് കുറച്ചും ചില ടിക്കറ്റ് നിരക്കുകൾ എടുത്തു കളഞ്ഞുമാണ് അദാനി ഇപ്പോൾ കയ്യടി നേടുന്നത്.
തിരുവനന്തപുരം വിമാനത്താവളത്തിലേക്ക് പ്രവേശിക്കുന്നതിനുള്ള എൻട്രി ടിക്കറ്റ് പൂർണമായും നീക്കിയിട്ടുണ്ട്. 85 രൂപയായിരുന്ന പാർക്കിങ് ഫീസ് 30 രൂപയാക്കി കുറച്ചു. പാർക്കിങ് ഏരിയയിലേക്ക് കടന്നാൽ മാത്രം ഫീസ് നൽകിയാൽ മതി. അതിന് ശേഷം മണിക്കൂറുകൾ കണക്കാക്കിയാണ് പണം ഈടാക്കുക.
ഗൾഫിലേക്ക് കുറഞ്ഞ ചിലവിൽ യാത്ര ചെയ്യാൻ സാധിക്കുന്ന എയർ അറേബ്യ സർവീസും ആരംഭിച്ചു. കഴിഞ്ഞ 16 മുതലാണ് അബുദാബിയിലേക്ക് എയർ അറേബ്യ സർവീസ് ആരംഭിച്ചത്. ഒന്നിടവിട്ട ദിനങ്ങളിലാണ് സർവീസ്. തിരുവനന്തപുരത്തേക്ക് 17,786 രൂപ മുതലാണ് നിരക്ക്. യുഎയിലേക്കുള്ള യാത്ര നിരക്ക് കുത്തനെ ഉയരുന്നതിനിടെ തിരുവനന്തപുരത്ത് നിന്നും ഈ നിരക്കിൽ യാത്ര ചെയ്യാൻ സാധിക്കുന്നത് പ്രവാസികൾക്ക് ഗുണകരമാണ്.
വിമാനത്താവളത്തിൽ 2018 മുതൽ അടച്ചിട്ടിരിക്കുന്ന ഡ്യൂട്ടി ഫ്രീ ഷോപ്പും ഇനി തുറക്കും. ജനുവരിയിൽ പുനരാരംഭിക്കുമെന്നാണ് സൂചന. ഇതോടെ തിരുവനന്തപുരം വഴി യാത്ര ചെയ്യുന്ന ആയിരക്കണക്കിന് രാജ്യാന്തര യാത്രക്കാരുടെ ആവശ്യമാണ് നിറവേറുക.
