കൊൽക്കത്ത : വികസനപ്രവർത്തനങ്ങൾക്ക് വേണ്ടി മാത്രം കേന്ദ്രത്തെ തേടിയെത്തുകയും അല്ലാത്തപ്പോൾ അനാവശ്യ വിമർശനങ്ങൾ ഉന്നയിക്കുകയും ചെയ്യുന്ന പശ്ചിമ ബംഗാൾ മുഖ്യമന്ത്രി മമതാ ബാനർജിയെ പരിഹസിച്ച് ബിജെപി. മമതയെ തൃണമൂൽ കോൺഗ്രസ് അടുത്ത പ്രധാനമന്ത്രി സ്ഥാനാർത്ഥിയായി പ്രഖ്യാപിക്കണമെന്ന് ബംഗാൾ ബിജെപി അദ്ധ്യക്ഷൻ സുകന്ദ മജൂംദാർ പറഞ്ഞു. സംസ്ഥാനത്തെ വികസനവുമായി ബന്ധപ്പെട്ട ചർച്ചകൾക്കായി മമതാ ഇന്ന് ഡൽഹിയിൽ എത്തും. ഇതിന്റെ പശ്ചാത്തലത്തിലാണ് ബിജെപിയുടെ പരിഹാസം.
മമതാ ബാനർജി ബംഗാളിലെ മുഖ്യമന്ത്രിയാണെങ്കിൽ ഡൽഹിയിൽ എത്തുകയും പ്രധാനമന്ത്രിയുൾപ്പെടെയുള്ളവരുമായി കൂടിക്കാഴ്ച നടത്തുകയും ചെയ്യുന്നത് സ്വാഭാവികമാണ്. മുഖ്യമന്ത്രിമാരാണെങ്കിൽ ഡൽഹിയിൽ എത്തുകയും സംസ്ഥാനത്തിന്റെ വികസനത്തിനായി കേന്ദ്രവുമായി ചർച്ച നടത്തുകയും ചെയ്യേണ്ടിവരുമെന്നും അദ്ദേഹം വ്യക്തമാക്കി. പ്രധാനമന്ത്രിയായാൽ മമതയ്‌ക്ക് ഇത് ഒഴിവാക്കാമെന്നും അദ്ദേഹം പരോക്ഷമായി പറഞ്ഞു.
പ്രധാനമന്ത്രിയാകുന്നതിൽ എതിർപ്പ് നേരിടുമോയെന്ന കാര്യത്തിൽ ആശങ്കപ്പെടേണ്ട. 2024 ലെ ലോക്‌സഭാ തെരഞ്ഞെടുപ്പിൽ മമതയെ പ്രധാനമന്ത്രി സ്ഥാനാർത്ഥിയായി തൃണമൂൽ കോൺഗ്രസ് പ്രഖ്യാപിക്കണം. ആദ്യം തൃണമൂൽ ഇത് ചെയ്താൽ മമതയെ എതിർ സ്ഥാനാർത്ഥിയായി തങ്ങൾ കാണുന്നുണ്ടോ ഇല്ലയോ എന്ന് വ്യക്തമാക്കാമെന്നും ബിജെപി പരിഹസിച്ചു. തങ്ങളുടെ പ്രധാനമന്ത്രി സ്ഥാനാർത്ഥിയെ പ്രഖ്യാപിച്ചു കഴിഞ്ഞു. അത് ഇപ്പോഴത്തെ പ്രധാനമന്ത്രി നരേന്ദ്ര മോദിയാണെന്നും മജൂംദാർ കൂട്ടിച്ചേർത്തു.
Comments