മനാമ: ലോകമെമ്പാടുമുള്ള കത്തോലിക്കാ വിശ്വാസികളുടെ ആഗ്രഹ സാഫല്യമായി ”ഔർ ലേഡി ഓഫ് അറേബ്യ” ദേവാലയം ബഹ്റൈനിൽ ഉദ്ഘാടനത്തിനു ഒരുങ്ങുന്നു. ഡിസംബർ ഒൻപതിനാണ് ദേവാലയത്തിന്റെ ഉദ്ഘാടനം. ബഹ്റൈൻ രാജാവ് ഹിസ് മജസ്റ്റി കിംഗ് ഹമദ് ബിൻ ഇസ അൽ ഖലീഫ ഉദ്ഘാടനം നിർവഹിക്കുമെന്ന് കഴിഞ്ഞ ദിവസം വിളിച്ചു ചേർത്ത വാർത്ത സമ്മേളനത്തിൽ ഭാരവാഹികൾ അറിയിച്ചു.
ബഹ്റൈൻ രാജാവ് ഇഷ്ടദാനം നൽകിയ ഒന്പതിനായിരം ചതുരശ്ര അടി ഭൂമിയിൽ നിർമ്മിച്ച മനോഹരമായ ദേവാലയത്തിൽ രണ്ടായിരത്തിനു മുകളിൽ വിശ്വാസികളെ ഉൾക്കൊള്ളുവാൻ സാധിക്കും. ബഹ്റൈൻ തലസ്ഥാനം മനാമയിൽ നിന്നും ഇരുപതു കിലോമീറ്റർ അകലെ അവാലിയിൽ ആണ് ദേവാലയം സ്ഥിതി ചെയ്യുന്നത്.
അഞ്ചര മില്യൺ ദിനാർ ചിലവഴിച്ചാണ് ദേവാലയത്തിന്റെ നിർമ്മാണം പൂർത്തിയാക്കിയിരിക്കുന്നത്. പ്രശസ്ത ഇറ്റാലിയൻ ഡിസൈനർ മാട്ടിയ ഡെൽ പ്രീറ്റാണ് ദേവാലയത്തിന്റെ പ്രാരംഭ രൂപകൽപ്പന നിർമ്മിച്ചത്. വിശദമായ ഡ്രോയിംഗുകളും മേൽനോട്ടവും ആർക്കിടെക്റ്റ് ഇസ്മായിൽ ഖോഞ്ചി & അസോസിയേറ്റ്സ് ഏറ്റെടുക്കുകയും, മുഹമ്മദ് ജലാൽ കോൺട്രാക്ടിങ് നിർമാണം പൂർത്തീകരിക്കുകയും ചെയ്തു.
ശനിയാഴ്ച വിളിച്ചു ചേർത്ത വാർത്ത സമ്മേളനത്തിൽ ഫാദർ സജി തോമസ്, ഫാദർ സേവ്യർ മരിയൻ ഡി ‘സൗസ , ജീസസ് സി പാലിങ്കോഡ്, മിഖായേൽ ബുവേനോ കാരനെ, ജിക്ക്സൺ ജോസ്, ബിനോയ് എബ്രഹാം, രഞ്ജിത് ജോൺ തുടങ്ങിയവർ പങ്കെടുത്തു.
