കൊല്ലം: കൊല്ലം ആര്യങ്കാവ് മേഖലയിൽ കനത്ത മഴ. ഒട്ടേറെ വീടുകളിലും സർക്കാർ ഓഫിസുകളിലും വ്യാപാര സ്ഥാപനങ്ങളിലും വെള്ളം കയറി. ആര്യങ്കാവ്, ഇടപ്പാളയം, കരിമ്പിൻ തോട്ടം മേഖലകളിലാണ് വെള്ളം കയറിയത്. വീടുകളിൽ നിന്നും ആളുകളെ സുരക്ഷിതമായ സ്ഥലത്തേയ്‌ക്ക് ഒഴിപ്പിച്ചിട്ടുണ്ട്.
വൃഷ്ടിപ്രദേശത്ത് മഴ തുടരുന്ന സാഹചര്യത്തിൽ ഇടുക്കി ഡാമിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. വൈദ്യുത വകുപ്പ് മന്ത്രി കെ കൃഷ്ണൻകുട്ടിയാണ് ഇക്കാര്യം അറിയിച്ചത്. ഡാമിന്റെ വൃഷ്ടിപ്രദേശത്ത് മഴ തുടരുന്നതിനാലും മുല്ലപ്പെരിയാർ ഡാമിൽ നിന്ന് ജലം ഒഴുകി എത്തുന്നതിനാലും സംഭരണയിലെ ജലനിരപ്പ് ഉയർന്നുവരികയാണ്. ഈ സാഹചര്യത്തിലാണ് രണ്ടാംഘട്ട മുന്നറിയിപ്പായ ഓറഞ്ച് അലർട്ട് ഇടുക്കി ഡാമിൽ പ്രഖ്യാപിച്ചിരിക്കുന്നത്.
ഇന്നലെ വൈകിട്ട് മുതൽ സംസ്ഥാനത്തെ ഒറ്റപ്പെട്ട ഇടങ്ങളിൽ കനത്ത മഴ തുടരുകയാണ്. കൊല്ലം ജില്ലയ്‌ക്ക് പുറമെ പത്തനംതിട്ടയിലും കനത്ത മഴ അനുഭവപ്പെട്ടിരുന്നു. രണ്ട് മണിക്കൂറിലേറെയായി തുടർച്ചയായി പെയ്ത മഴയിൽ അപ്രതീക്ഷിതമായി പമ്പാ നദി കരകവിഞ്ഞൊഴുകിയിരുന്നു. തുടർന്ന് ദർശനത്തിനായി ശബരിമലയിലേക്ക് പോകാനെത്തിയവരെ ഒരുമണിക്കൂറിലേറെ പമ്പയിൽ തടഞ്ഞു നിർത്തി. വൈകിട്ട് നാലരയ്‌ക്കാണ് ഇടിയോടുകൂടിയ ശക്തമായ മഴ തുടങ്ങിയത്.
Comments