സുരേഷ് ഗോപിയുടെ 252-ാം ചിത്രം: പാപ്പന്റെ രണ്ടാം ഘട്ട ചിത്രീകരണം തുടങ്ങുന്നു

സുരേഷ് ഗോപിയെ നായകനാക്കി ജോഷി സംവിധാനം ചെയ്യുന്ന പാപ്പന്റെ രണ്ടാം ഷെഡ്യൂൾ ഡിസംബർ 13ന് ആരംഭിക്കും. കോട്ടയം ഈരാറ്റുപേട്ടയിലാണ് ചിത്രീകരണം തുടങ്ങുന്നത്. സലാം കാശ്മീരിന് ശേഷം ജോഷിയും സുരേഷ് ഗോപിയും ഒന്നിയ്‌ക്കുന്ന ചിത്രമാണിത്. മാത്യൂസ് പാപ്പൻ ഐപിഎസ് എന്ന കഥാപാത്രത്തെയാണ് സുരേഷ് ഗോപി അവതരിപ്പിക്കുന്നത്.

സുരേഷ് ഗോപിയുടെ സിനിമാ ജീവിതത്തിലെ 252-ാം ചിത്രമാണിത്. മകൻ ഗോകുൽ സുരേഷും ചിത്രത്തിൽ പ്രധാന വേഷത്തെ അവതരിപ്പിക്കുന്നുണ്ട്. ഇരുവരും ആദ്യമായി ഒരുമിച്ചെത്തുന്ന ചിത്രം കൂടിയാണിത്. ഡേവിഡ് കാച്ചപ്പിള്ളി പ്രൊഡക്ഷൻസ് നിർമ്മിക്കുന്ന ചിത്രത്തിൽ ഇഫാർ മീഡിയ കൂടി നിർമ്മാണ പങ്കാളിയാകുന്നുണ്ട്.

ഒന്നിലധികം ലുക്കിൽ സുരേഷ് ഗോപി പ്രത്യക്ഷപ്പെടുമെന്ന പ്രത്യേകതയും സിനിമയ്‌ക്കുണ്ട്. ക്രൈം ത്രില്ലർ വിഭാഗത്തിൽ പെടുന്ന ചിത്രത്തിൽ നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ തുടങ്ങിയവരും അഭിനയിക്കുന്നു. റേഡിയോ ജോക്കിയും തിരക്കഥാകൃത്തുമായ ആർ ജെ ഷാനിൻറേതാണ് ചിത്രത്തിന്റെ രചന.