റിലയൻസ് ഫൗണ്ടേഷന്റെ ചെയർപേഴ്സണും സംരംഭകയുമായ നിത അംബാനിയുടെ ചില ചിത്രങ്ങൾ അടുത്തിടെ വൈറലായിരുന്നു. ലോകത്തിൽ വച്ചേറ്റവും വിലപിടിപ്പുള്ള പാനീയം കുടിക്കുന്ന നിത അംബാനി എന്നു പറഞ്ഞായിരുന്നു ചിത്രങ്ങൾ വൈറലായിരുന്നത്. പിന്നാലെ, ചിത്രം യഥാർഥമല്ലെന്നും മോർഫ് ചെയ്തതാണെന്നും നിതാ അംബാനിയുടെ ഓഫിസ് അറിയിക്കുകയും ചെയ്തു.
2015ൽ ഐപിഎൽ കാണുന്ന നിത അംബാനിയാണ് ചിത്രത്തിലുള്ളത്. റിലയൻസിന്റെ ഉടമസ്ഥതയിലുള്ള മുംബൈ ഇന്ത്യൻസും കൊൽക്കത്ത നൈറ്റ് റൈഡേഴ്സും തമ്മിലുള്ള മാച്ച് കാണുകയായിരുന്നു നിത. സാധാരണ മിനറൽ വാട്ടർ കുടിക്കുന്ന ചിത്രം ആരോ പകർത്തിയിരുന്നു. ഇതാണ് ഇപ്പോൾ മോർഫ് ചെയ്ത് മാറ്റി പ്രചരിപ്പിക്കപ്പെട്ടത്.
24 കാരറ്റ് തങ്കത്തിൽ പൊതിഞ്ഞ ചില്ലു കുപ്പിയിലാണ് വെള്ളം കിട്ടുന്നത്. ഈ കുപ്പി ഡിസൈൻ ചെയ്തിരിക്കുന്നത് ബോട്ടിൽ ഡിസൈനിൽ ലോകപ്രസിദ്ധനായ ഫെർനാൻഡോ അൽമിറാനോയാണ് . ഇറ്റാലിയൻ ആർട്ടിസ്റ്റ് അമേഡിയോ ക്ലെമന്റോയ്ക്കുള്ള ആദരമായിട്ടാണ് ഡിസൈൻ തയാറാക്കിയത്.
750 മില്ലി ലിറ്ററിന് $60,000 അഥവാ നാൽപത്തിനാലു ലക്ഷത്തോളം രൂപയാണ് പാനീയത്തിന്റെ വില. അതിനൊരു കാരണവുമുണ്ട്. ഭൂമിയുടെ മൂന്ന് വിവിധ ഭാഗങ്ങളിൽ നിന്നാണ് ഈ പാനീയം നിർമിക്കാനുള്ള ജലമെടുക്കുന്നത്. ഫിജി, ഫ്രാൻസ്, ഐസ്ലൻഡ് തുടങ്ങിയ ഇടങ്ങളിൽ ലഭ്യമാകുന്ന ലോകത്തിലെ ഏറ്റവും ശുദ്ധമായ ജലമാണ് ഈ പാനീയം നിർമിക്കാൻ ഉപയോഗിക്കുന്നത്. അതിൽ 5 ഗ്രാം വീതം 23 കാരറ്റ് സ്വർണത്തരികളും ചേർത്തിട്ടുണ്ട്. മിനറൽ വാട്ടറിനൊപ്പം സ്വർണത്തരികളും ചേരുമ്പോൾ വെള്ളത്തിന്റെ ആൽക്കലൈൻ സ്വഭാവം കൂടുമെന്നും കൂടുതൽ ഊർജദായകമാകുമെന്നും കരുതപ്പെടുന്നു.
