ഒമിക്രോൺ; രാജ്യത്തെ ആറ് വിമാനത്താവളങ്ങളിൽ കനത്ത ജാഗ്രത ; ആർടിപിസിആർ പരിശോധനയ്‌ക്ക് മുൻകൂട്ടി ബുക്ക് ചെയ്യാൻ നിർദ്ദേശം;ബുക്ക് ചെയ്യേണ്ടതിങ്ങനെ

ന്യൂഡൽഹി:രാജ്യത്ത് ഒമിക്രോൺ ബാധിതരുടെ എണ്ണം വർദ്ധിക്കുന്ന സാഹചര്യത്തിൽ വിമാനത്താവളങ്ങളിലടക്കം കനത്ത ജാഗ്രത നിർദ്ദേശം.വിമാനത്താവളങ്ങൾ പരിശോധന ശക്തമാക്കാൻ കേന്ദ്രസർക്കാർ നിർദ്ദേശം നൽകി.രാജ്യത്തെ ആറ് വിമാനത്താവളങ്ങളിൽ ആർടിപിസിആർ പരിശോധന ഇന്നലെ മുതൽ നിർബന്ധമാക്കി.

ഒമിക്രോൺ ബാധ കൂടുതലുള്ള, ഹൈ റിസ്‌ക് വിഭാഗത്തിൽപ്പെടുത്തിയിട്ടുള്ള രാജ്യങ്ങളിൽ നിന്ന് എത്തുന്നവർക്കാണ് പരിശോധന നിർബന്ധമാക്കിയത്. പരിശോധന നടത്തുന്നതിനായി മുൻകൂട്ടി ബുക്ക് ചെയ്യണം. ഇതിനുള്ള സൗകര്യം എയർ സുവിധ പോർട്ടലിൽ സജ്ജമാക്കും.

സിവിൽ ഏവിയേഷൻ മന്ത്രാലയം ഇത് സംബന്ധിച്ച ഉത്തരവ് പുറത്തിറക്കി. നിലവിൽ ഡൽഹി, മുംബൈ, കൊൽക്കത്ത, ബെംഗളൂരു, ചെന്നൈ, ഹൈദരാബാദ് എന്നീ വിമാനത്താവളങ്ങളിൽ എത്തുന്ന യാത്രക്കാരാണ് ആർടിപിസിആർ പരിശോധനക്ക് മുൻകൂട്ടി ബുക്ക് ചെയ്യേണ്ടത്. യാത്രക്കാർക്ക് മറ്റ് ബുദ്ധിമുട്ടുകളില്ലെന്ന് കണ്ടാൽ മറ്റ് വിമാനത്താവളങ്ങളിലേക്കും ഇത് വ്യാപിപ്പിക്കുമെന്നാണ് വിവരം.

വിമാനത്താവളങ്ങളിൽ മുൻകൂട്ടി ബുക്ക് ചെയ്യുന്നതിനായി അന്താരാഷ്‌ട്ര വിമാനത്താവളത്തിന്റെ ഔദ്യോഗിക വെബ്സൈറ്റ് സന്ദർശിക്കുകയാണ് വേണ്ടത്. ഏറ്റവും മുകളിലായി കാണുന്ന ‘Book Covid19 Test’ ക്ലിക്ക് ചെയ്യുക. തുടർന്ന് അന്താരാഷ്‌ട്ര യാത്രക്കാരൻ എന്നത് തിരഞ്ഞെടുക്കുക. പേര്, ഇമെയിൽ, ഫോൺ നമ്പർ, ആധാർ നമ്പർ, പാസ്പോർട്ട് നമ്പർ, മേൽവിലാസം, എത്തിച്ചേരുന്ന സമയം, തീയതി എന്നിവ രേഖപ്പെടുത്തുക. ആർടിപിസിആർ, റാപിഡ് ആർടിപിസിആർ ഇതിൽ ഏത് വേണമെന്ന് തിരഞ്ഞെടുക്കുകയും വേണം.