ന്യൂഡല്ഹി: നിയമസഭാ തിരഞ്ഞെടുപ്പിന് കളമൊരുങ്ങുന്ന അഞ്ച് സംസ്ഥാനങ്ങളില് ഒന്നായ പഞ്ചാബില് മുഖ്യമന്ത്രിക്കെതിരെ മുന്മുഖ്യമന്ത്രി ഗുരുതരമായ ആരോപണവുമായി രംഗത്ത് എത്തി. മുഖ്യമന്ത്രി ചന്നിക്ക് ഖനിമാഫിയയുമായി ബന്ധമുണ്ടെന്നും ഇദ്ദേഹം പറയുന്നത്
കളവാണെന്നും മുന്മുഖ്യമന്ത്രി അമരീന്ദര് സിങ് ആരോപണമുന്നയിച്ചു. മുന്കോണ്ഗ്രസ് നേതാവായ അമരീന്ദര്സിങിന്റെ വെളിപ്പെടുത്തല് നിയമസഭാ തിരഞ്ഞെടുപ്പില് കോണ്ഗ്രസിനെ പ്രതികൂലമായി ബാധിക്കും.
മുഖ്യമന്ത്രി ആയിരുന്നപ്പോള് ഇക്കാര്യം എഐസിസി അധ്യക്ഷ സോണിയ ഗാന്ധിയെ അറിയിച്ചിരുന്നു. എന്നാല് സോണിയ ഇക്കാര്യത്തില് ഒന്നുംപറയാത്തതിനാല് നടപടി എടുക്കാനായില്ലെന്നും അമരീന്ദര് പറഞ്ഞു.
കഴിഞ്ഞ സെപ്റ്റംബറില് മുഖ്യമന്ത്രി സ്ഥാനം ഒഴിഞ്ഞ അമരീന്ദര്സിങ് പഞ്ചാബ് ലോക് കോണ്ഗ്രസ് എന്ന പുതിയ പാര്ട്ടിയുണ്ടാക്കി. തുടര്ന്ന് ബിജെപിയുമായി സഖ്യത്തിലായ അമരീന്ദര്സിങ് മുന്സഹപ്രവര്ത്തകരുടെ ചെയ്തികള് തുറന്നുപറഞ്ഞ് അവരെ പ്രതിക്കൂട്ടില് നിര്ത്തുകയാണ്.
