ന്യൂഡല്ഹി: യുപിയോട് ഒപ്പം തന്നെ പ്രാധാന്യത്തോടെ രാജ്യം ഉറ്റുനോക്കുന്ന നിയമസഭാ തെരഞ്ഞെടുപ്പാണ് പഞ്ചാബിലേത്. അമരീന്ദര് സിംഗിന്റെ പിന്മാറ്റത്തോടെ ദുര്ബ്ബലരായ കോണ്ഗ്രസ് ഭരണം നിലനിര്ത്താനുളള പെടാപ്പാടിലാണ്. മാറിമറിഞ്ഞ രാഷ്ട്രീയ സാഹചര്യത്തില് ബിജെപിക്കും എന്ഡിഎയ്ക്കും വലിയ പ്രതീക്ഷയാണ് പഞ്ചാബ് നല്കുന്നത്. സഖ്യകക്ഷികളുടെ പ്രകടനമാകും എന്ഡിഎയുടെ വിജയത്തിലേക്കുളള തുറുപ്പുചീട്ട്.
പഞ്ചാബിലെ 117 സീറ്റുകളില് 65 സീറ്റുകളില് ബിജെപി മത്സരിക്കുമ്പോള് പ്രധാന സഖ്യകക്ഷിയായ പഞ്ചാബ് ലോക്കോണ്ഗ്രസ് 38 സീറ്റുകളിലും എസ്എഡി 14 സീറ്റുകളിലും മത്സരിക്കും. ബിജെപിയുടെ പകുതി സീറ്റുകള് സിഖ് വിഭാഗത്തിന് നല്കുമെന്നും പാര്ട്ടി ജനറല് സെക്രട്ടറി തരുണ്ചുഗ് പറഞ്ഞു. സിഖ് വിഭാഗത്തിന് കൂടുതല് സീറ്റ് നല്കുന്നതിലൂടെ പഞ്ചാബിലെ പ്രബലവിഭാഗത്തിന്റെ വികാരം മാനിക്കല് കൂടിയാവും അത്.
സഖ്യത്തിന് ആകെ 60 ശതമാനം സിഖ് സ്ഥാനാര്ത്ഥികളാവും ഉണ്ടാവുക. പിന്നാക്കവിഭാഗങ്ങള്ക്കും കര്ഷകര്ക്കും പ്രധാന്യം നല്കിയാവും സ്ഥാനാര്ത്ഥി നിര്ണയം. ആദ്യഘട്ടമായി 34 സീറ്റുകളിലേക്കുളള സ്ഥാനാര്ത്ഥികളുടെ പട്ടിക ബിജെപി കഴിഞ്ഞ ദിവസം പുറത്തിറക്കിയിരുന്നു.
മുന്കോണ്ഗ്രസ് നേതാവും മുഖ്യമന്ത്രിയുമായിരുന്ന അമരീന്ദര് സിംഗ് നയിക്കുന്ന പഞ്ചാബ് ലോക് കോണ്ഗ്രസ് പഞ്ചാബില് അധികാരത്തിലെത്താന് ബിജെപിക്ക് സഹായകമാകും. അമരീന്ദര് സിംഗ് പാട്യാലയില് തന്നെ മത്സരിക്കും. 2017 ല് അമരീന്ദറിന്റെ നേതൃത്വത്തിലാണ് കോണ്ഗ്രസ് അധികാരത്തിലെത്തിയത്. സെപ്തംബറില് കോണ്ഗ്രസ് ഹൈക്കമാന്ഡ് ഇടപെട്ട് അധികാരത്തില് നിന്നു നീക്കിയതോടെയാണ് അമരീന്ദര് പുതിയപാര്ട്ടി രൂപീകരിച്ച് ബിജെപിയുമായി സഖ്യത്തിലായത്.
അതെ സമയം മുഖ്യമന്ത്രി ചരണ്ജിത്ത് സിങ് ചന്നിയും പിസിസി പ്രസിഡന്റ് നവജ്യോത് സിങ് സിദ്ദുവും തമ്മില് ഭിന്നതനിലനില്ക്കുന്ന സാഹചര്യത്തില് കോണ്ഗ്രസിന്റെ സ്ഥാനാര്ത്ഥി പട്ടികയില് തീരുമാനമായില്ല.
