ചെന്നൈ: എൽ.ടി.ടി.ഇ തിരിച്ചുവരവിന് ശ്രമിക്കുന്നുവെന്ന് രഹസ്യാന്വേഷണ റിപ്പോർട്ട്. ഇതേ തുടർന്ന് കേന്ദ്ര എജൻസികളും തമിഴ്നാട് പോലീസിന്റെ ക്യൂ ബ്രാഞ്ചും നിരീക്ഷണം ശക്തമാക്കി. ഇന്ത്യയിലെ ബാങ്കുകളിലെ പണം പിൻവലിച്ച് പ്രവർത്തകരെ ഏകോപിപ്പിച്ചുകൊണ്ടാണ് തിരിച്ചുവരവെന്നാണ് വിവരം.
ശ്രീലങ്കൻ സ്വദേശിയുൾപ്പടെ അഞ്ചുപേർ ചെന്നൈയിൽ വ്യാജപാസ്പോർട്ടുമായി പിടിയിലായ സംഭവത്തെക്കുറിച്ചുള്ള അന്വേഷണം എൻഐഎ ഏറ്റെടുത്തതോടെയാണ് എൽടിടിഇ ബന്ധത്തിന് സൂചന ലഭിച്ചത്.
തമിഴ് പുലികൾക്ക് വേണ്ടി വിദേശരാജ്യങ്ങളിൽ നിന്ന് നേരത്തെ സമാഹരിച്ച കോടിക്കണക്കിന് രൂപ പല അക്കൗണ്ടുകളിലായി ഇന്ത്യയിലെ ബാങ്കുകളിൽ ഇപ്പോഴുമുണ്ടെന്നാണ് ഉദ്യോഗസ്ഥർക്ക് ലഭ്യമായ വിവരം. ഈ പണം പിൻവലിച്ച് എൽടിടിഇയുടെ പുനരേകീകരണത്തിന് ധനസമാഹരണം നടത്താൻ ശ്രമിച്ചവരാണ് വ്യാജപാസ്പോർട്ടുമായി അറസ്റ്റിലായതെന്ന് എൻഐഎ വ്യക്തമാക്കിയിരുന്നു.
ഒരു ദേശസാൽകൃത ബാങ്കിന്റെ മുംബൈയിലെ ഫോർട്ട് ബ്രാഞ്ചിലുള്ള പണം പിൻവലിച്ച് കടലാസ് കമ്പനിയിലേക്ക് മാറ്റാൻ ശ്രമിച്ചതായി എൻഐഎ കണ്ടെത്തിയിട്ടുണ്ട്. തമിഴ്നാട്ടിലെ ചില സന്നദ്ധ സംഘടനകളിലും എൽ.ടി.ടി.ഇ അനുഭാവികളുണ്ടെന്നാണ് നിഗമനം. ഇവരെല്ലാം നിരീക്ഷണത്തിലാണെന്നും തീവ്രവാദബന്ധം സ്ഥിരീകരിച്ചാൽ കർശനനടപടിയുണ്ടാകുമെന്നും കേന്ദ്ര എജൻസികൾ മുന്നറിയിപ്പ് നൽകിയിട്ടുണ്ട്.
