തീയേറ്ററുകൾ കീഴടക്കാൻ നെയ്യാറ്റിൻകര ഗോപൻ എത്തുന്നു: ആറാട്ട് ഫെബ്രുവരി 18ന് പ്രദർശനത്തിനെത്തും

ആരാധകർ ഒന്നടങ്കം കാത്തിരിക്കുന്ന മോഹൻലാൽ ചിത്രം ആറാട്ടിന്റെ റിലീസ് തീയതി പ്രഖ്യാപിച്ചു. ഫെബ്രുവരി 18ന് ചിത്രം തീയേറ്ററിൽ പ്രദർശനത്തിനെത്തുമെന്ന് സംവിധായകൻ ബി. ഉണ്ണിക്കൃഷ്ണനും നടൻ മോഹൻലാലും അറിയിച്ചു. മരക്കാറിന് ശേഷം തീയേറ്ററിൽ എത്തുന്ന മോഹൻലാൽ ചിത്രമാണ് ആറാട്ട്. വില്ലൻ എന്ന സിനിമയ്‌ക്ക് ശേഷം മോഹൻലാലും ഉണ്ണികൃഷ്ണനും ഒന്നിയ്‌ക്കുന്ന ചിത്രമാണ് ആറാട്ട്.

നെയ്യാറ്റിൻകര ഗോപൻ എന്ന കഥാപാത്രമായാണ് ആറാട്ടിൽ മോഹൻലാൽ എത്തുന്നത്. ‘നെയ്യാറ്റിൻകര ഗോപന്റെ ആറാട്ട്’ എന്നാണ് സിനിമയുടെ മുഴുവൻ പേര്. ഒരു പ്രത്യേക ചുമതല നിർവ്വഹിക്കുന്നതിനായി നെയ്യാറ്റിൻകരയിൽ നിന്നും പാലക്കാട്ടെ ഒരു ഗ്രാമത്തിൽ ഗോപൻ എത്തുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം. 18 കോടി ബഡ്ജറ്റിലാണ് ചിത്രം നിർമ്മിച്ചിരിക്കുന്നത്. ശ്രദ്ധ ശ്രീനാഥ് ആണ് ചിത്രത്തിൽ നായികയായി എത്തുന്നത്.

മോഹൻലാൽ നിറഞ്ഞാടി അഭിനയിക്കുന്ന മാസ് മസാല ചിത്രമാണിതെന്നാണ് തിരക്കഥാകൃത്ത് ഉദയകൃഷ്ണൻ പറയുന്നത്. ചിത്രത്തിൽ മോഹൻലാൽ ഉപയോഗിക്കുന്ന കറുത്ത ബെൻസ് കാർ ശ്രദ്ധനേടിയിരുന്നു. ‘രാജാവിന്റെ മകനിലെ’ മൈ ഫോൺ നമ്പർ ഈസ് 2255′ എന്ന ജനപ്രിയ ഡയലോഗ് ഓർമ്മിപ്പിക്കും വിധം കാറിനും 2255 എന്ന നമ്പറാണ് നൽകിയിരിക്കുന്നത്.