തിരുവനന്തപുരം: മുണ്ടും ഷര്‍ട്ടും ധരിച്ച് തനതുകേരളീയ വേഷത്തില്‍ മാത്രം കണ്ടിരുന്ന മുഖ്യമന്ത്രി പിണറായി വിജയന്റെ ദുബായിലെ വേഷപ്പകര്‍ച്ച ഏറെ ചര്‍ച്ച ചെയ്തിരുന്നു. പാന്റും പാന്റിനകത്ത് ഷര്‍ട്ട് ഇന്‍സര്‍ട്ട് ചെയ്തു ഫുള്‍ സ്ലീവോടെയുള്ള മുഖ്യമന്ത്രിയുടെ വരവ് സോഷ്യല്‍ മീഡിയ വല്ലാതെ ആഘോഷിച്ചിരുന്നു. അതിന്റെ അലയൊലി മാറുംമുന്‍പാണ് മരുമകന്‍ മന്ത്രി മുഹമ്മദ് റിയാസിന്റെ വേഷപ്പകര്‍ച്ച ചര്‍ച്ചയാകുന്നത്.
പാന്റും ഷര്‍ട്ടും ഓവര്‍കോട്ടുമായി ഒരടിപൊളി ലുക്കിലാണ് മുഖ്യമന്ത്രിയുടെ മരുമകന്‍ മന്ത്രി മുഹമ്മദ് റിയാസ് പ്രത്യക്ഷപ്പെട്ടത്. അതോടെ മുഖ്യമന്ത്രിയില്‍ നിന്നും ശ്രദ്ധ മുഹമ്മദ് റിയാസിലേക്ക് ഫോക്കസ് ചെയ്തു. അറബികളും നാട്ടുകാരുമൊക്കെയായി ഫോട്ടോഷൂട്ട് നടത്തുന്ന പലപോസിലുള്ള മുഹമ്മദ് റിയാസിന്റെ പടങ്ങളാണ് സോഷ്യല്‍മീഡിയയില്‍ തരംഗമാകുന്നത്. മുഖ്യമന്ത്രിയെ കടത്തി വെട്ടി മുന്നേറുകയാണ് മരുമകന്‍ മന്ത്രി മുഹമ്മദ് റിയാസ്.
സംസ്ഥാനമന്ത്രി സഭയിലെ പ്രായംകുറഞ്ഞ മന്ത്രിയായ മുഹമ്മദ് റിയാസ് ഫേസ്ബുക്കില്‍ പങ്കുവച്ച പടങ്ങളാണിവ. ദുബായിലെ സന്ദര്‍ശനത്തിനുശേഷം അദ്ദേഹം പറഞ്ഞത് വിനോദസഞ്ചാരമേഖലയില്‍ യുഎഇയിലെ നിക്ഷേപകര്‍ക്ക് വലിയ സാധ്യതയാണ് നിലനില്‍ക്കുന്നതെന്നാണ്. ലോകടൂറിസം മാപ്പില്‍ പ്രഥമസ്ഥാനമുണ്ടായിരുന്ന കേരളത്തിന്റെ നേട്ടം തിരിച്ചുകൊണ്ടുവരാന്‍ വലിയ ശ്രമങ്ങളാണ് സര്‍ക്കാര്‍ നടത്തുന്നതെന്നും മുഹമ്മദ് റിയാസ് പറഞ്ഞു.
കൊറോണയ്‌ക്ക്‌ശേഷം വിനോദസഞ്ചാരമേഖലയെ പുഷ്ടിപ്പെടുത്താന്‍ ഒട്ടേറെ ആകര്‍ഷകപദ്ധതികള്‍ ആവിഷ്‌കരിച്ചതായും അദ്ദേഹം പറഞ്ഞു. ദുബായിലെ മലയാളി സംരഭകരോട് കേരളത്തിലെ വിനോദസഞ്ചാരമേഖലയുടെയും മറ്റുവ്യവസായങ്ങളിലും നിക്ഷേപക പങ്കാളിത്തം ഉറപ്പുവരുത്താന്‍ അദ്ദേഹം ആവശ്യപ്പെട്ടു.
കാരവന്‍ ടൂറിസം, സാഹസിക ടൂറിസം, മലബാര്‍ മേഖലയുടെ ടൂറിസം സാധ്യതകള്‍ തുടങ്ങി പുതിയ പദ്ധതികള്‍ ആവിഷ്‌കരിച്ച് നിക്ഷേപകസാഹചര്യം ഒരുക്കിയതായും മുഹമ്മദ് റിയാസ് പറഞ്ഞു. ദുബായ് കണ്ട മുഹമ്മദ് റിയാസ് കേരളത്തിലെ ടൂറിസം മേഖലയില്‍ പുതുമകള്‍ ആവിഷ്‌കരിച്ച് മുന്നേറുമോ..? അതോ മുഖ്യമന്ത്രിയുടെ പഴയ പ്രളയ അതിജീവന പദ്ധതിയായ ഡച്ച് പദ്ധതിയുടെ അവസ്ഥയാകുമോയെന്നാണ് ചോദ്യമവശേഷിക്കുന്നത്.
Comments