ബുർഖ ധരിച്ച് ക്ഷേത്രദർശനത്തിനെത്തി യുവതി , തടഞ്ഞ് അധികൃതർ : ജിന്ന് പറഞ്ഞിട്ടാണ് ബുർഖ ഇട്ട് വന്നതെന്ന് യുവതി

ഭോപ്പാൽ : ബുർഖ ധരിച്ച് ക്ഷേത്രദർശനത്തിനെത്തിയ യുവതിയെ അധികൃതർ തടഞ്ഞു . ഉജ്ജയിനിലെ മഹാകാൽ ക്ഷേത്രത്തിലാണ് ബുർഖ ധരിച്ച് ദർശനം നടത്താൻ യുവതി എത്തിയത് . ബുർഖ ധരിച്ച് യുവതിയെ കണ്ടതോടെ ആളുകളും കൂടി , സ്ഥലത്ത് സംഘർഷാവസ്ഥയായി .

ബാബ മഹാകാൽ ദർശനത്തിനായി എത്തിയ ഭക്തരും യുവതിയെ കണ്ട് അമ്പരന്നു . ഇതിനിടെ ക്ഷേത്രത്തിലെ സുരക്ഷാ ഉദ്യോഗസ്ഥർ യുവതിയെ കാണുകയും തടയുകയുമായിരുന്നു. തുടർന്ന് ക്ഷേത്ര ഭരണസമിതി അധികൃതർ സ്ഥലത്തെത്തി യുവതിയോട് സംസാരിച്ചു.

ബുർഖ ധരിച്ചെത്തിയെങ്കിലും താൻ മുസ്ലീം അല്ലെന്നാണ് യുവതി പറഞ്ഞത് . രാജസ്ഥാനിലെ ഭിൽവാരയിൽ അമ്മയ്‌ക്കും അച്ഛൻ ദൽചന്ദിനുമൊപ്പമാണ് ക്ഷേത്രത്തിലെത്തിയതെന്നും തന്റെ പേര് ലക്ഷ്മി എന്നാണെന്നും യുവതി അധികൃതരോട് പറഞ്ഞു .

മറ്റ് വിവരങ്ങളും അധികൃതരും, പോലീസും ചോദിച്ചറിഞ്ഞു . യുവതിയ്‌ക്ക് മാനസിക അസ്വാസ്ഥ്യമുള്ളതായും, ബുർഖ ധരിച്ച് മഹാകാൽ ക്ഷേത്രത്തിലേക്ക് വരാൻ ഏറെ നാളായി നിർബന്ധിക്കുകയായിരുന്നുവെന്നുമാണ് യുവതിയുടെ കുടുംബാംഗങ്ങൾ പറയുന്നത്.

ആഗ്രഹം സഫലമാക്കാനായാണ് വീട്ടുകാർ യുവതിയെ ക്ഷേത്രത്തിലേക്ക് കൊണ്ടുവന്നത് . അതേസമയം, ബുർഖ ധരിച്ച് ക്ഷേത്രത്തിൽ വന്നതിന്റെ കാരണം പോലീസ് ചോദിച്ചപ്പോൾ ജിന്നിന്റെ നിർദേശപ്രകാരമാണ് താൻ ബുർഖ ധരിച്ച് ക്ഷേത്രത്തിൽ എത്തിയതെന്നാണ് യുവതി പറഞ്ഞത് .