ഉണ്ണി മുകുന്ദന്റെ ഏറ്റവും പുതിയ ചിത്രമായ മേപ്പടിയാൻ ഇരുകയ്യും നീട്ടി പ്രേക്ഷകർ സ്വീകരിച്ചിരുന്നു. നവാഗതനായ വിഷ്ണു മോഹൻ സംവിധാനം ചെയ്ത ചിത്രത്തിൽ കുടുംബ നായകനായിട്ടാണ് ഉണ്ണി എത്തിയത്. മേപ്പടിയാനിലൂടെ താരത്തിന്റെ മസിലളിയൻ എന്ന ഇമേജ് തന്നെ മാറുകയായിരുന്നു. നടന്റെ സ്റ്റൈലൻ കഥാപാത്രങ്ങൾ സ്വീകരിച്ച പ്രേക്ഷകർ മേപ്പടിയാനിലെ ജയകൃഷ്ണനേയും സ്വീകരിച്ചിരിക്കുകയാണ്. തീയേറ്റർ റിലീസിന് പിന്നാലെയുള്ള ഒടിടി റിലീസിലും മികച്ച പ്രതികരണമാണ് ചിത്രത്തിന് ലഭിക്കുന്നത്.
വലിയ നിരൂപക പ്രശംസ നേടിയ ചിത്രമാണ് മേപ്പടിയാൻ. മേപ്പടിയാൻ കാണുന്ന ഓരോ പ്രേക്ഷകരും പറഞ്ഞിരുന്നത് ‘ഇത് ഞങ്ങളുടെ കഥയെന്നാണ്’. മേപ്പടിയാൻ സിനിമയെ കുറിച്ചുള്ള എല്ലാവരുടേയും പോസ്റ്റുകൾ ഫേസ്ബുക്കിൽ ഷെയർ ചെയ്യുകയാണ് ഉണ്ണിമുകുന്ദൻ ഇപ്പോൾ. ആരേയും ഒഴിവാക്കാതെയുള്ള ഉണ്ണിയുടെ പ്രതികരണം സിനിമാ പ്രേക്ഷകരും ഏറ്റെടുത്തിട്ടുണ്ട്. ജനപ്രിയനായകെന്നാണ് സോഷ്യൽ മീഡിയ ഒന്നടങ്കം ഒറ്റസ്വരത്തിൽ പറയുന്നത്. തീയേറ്ററിൽ കാണാൻ സാധിക്കാത്തവർക്ക് വേണ്ടി ഫെബ്രുവരി 18നാണ് ചിത്രം ഒടിടിയിൽ റിലീസ് ചെയ്തത്.
ഒടിടിയിൽ ചിത്രം കണ്ട ശേഷവും നിരവധി പേർ ഉണ്ണി മുകുന്ദനേയും ചിത്രത്തേയും പ്രശംസിച്ച് ഫേസ്ബുക്കിലൂടെ എത്തി. ആരേയും ഒഴിവാക്കാതെ എല്ലാവരുടേയും പോസ്റ്റ് ഉണ്ണി മുകുന്ദനും ഷെയർ ചെയ്തിട്ടുണ്ട്. ‘ഒരു മസിൽ അളിയൻ ഇമേജിൽ നിന്നും ജയകൃഷ്ണൻ എന്ന കഥാപാത്രത്തിലൂടെ തന്റെ ശക്തമായ തിരിച്ചുവരവ് തന്നെയാണ് ഉണ്ണിമുകുന്ദൻ എന്ന നടൻ മേപ്പടിയാനിൻ അടയാളപ്പെടുത്തിയിരിക്കുന്നത്’ എന്നാണ് കൂടുതൽ പേരും സോഷ്യൽ മീഡിയയിൽ കുറിച്ചിരിക്കുന്നത്.
ജനുവരി 14നാണ് മേപ്പടിയാൻ റിലീസ് ചെയ്തത്. മേപ്പടിയാന്റെ നിർമ്മാണത്തിനായി ഉണ്ണി മുകുന്ദൻ ഫിലിം കമ്പനിക്ക് ചിലവായത് 5.5 കോടി രൂപയാണ്. വർക്ക് ഷോപ്പ് നടത്തിപ്പുകാരനായ ജയകൃഷ്ണൻ എന്ന തനി നാട്ടിൻപുറംകാരൻ യുവാവായിട്ടാണ് ഉണ്ണി അഭിനയിക്കുന്നത്. അഞ്ജു കുര്യനാണ് നായിക. ഇന്ദ്രൻസ്, സൈജു കുറുപ്പ്, അജു വർഗീസ്, വിജയ് ബാബു, കലാഭവൻ ഷാജോൺ, മേജർ രവി, ശങ്കർ രാമകൃഷ്ണൻ, ശ്രീജിത്ത് രവി, കോട്ടയം രമേശ്, കൃഷ്ണ പ്രസാദ്, കുണ്ടറ ജോണി, ജോർഡി പൂഞ്ഞാർ, സ്മിനു, പൗളി വത്സൻ, മനോഹരിയമ്മ തുടങ്ങിയവരും ഈ ചിത്രത്തിൽ പ്രധാന വേഷങ്ങളായി എത്തിയിരുന്നു.
