ലക്‌നൗ: മുസ്ലീം വിഭാഗത്തില്‍ നിന്നുള്ള ഒരു വ്യക്തി പോലും അഖിലേഷ് യാദവിന്റെ സമാജ്‌വാദി പാര്‍ട്ടിയ്‌ക്ക് വേണ്ടി വോട്ട് ചെയ്യില്ലെന്ന് ബിഎസ്പി അധ്യക്ഷ മായാവതി. എസ്പിയുടെ പ്രവര്‍ത്തികളില്‍ മുസ്ലീം വിഭാഗത്തിലുള്ളവര്‍ സംതൃപ്തരല്ലെന്നും അതുകൊണ്ട് ആരും വോട്ട് ചെയ്യില്ലെന്നുമാണ് മായാവതി പറഞ്ഞത്. യുപിയില്‍ ഇന്ന് നാലാം ഘട്ട വോട്ടെടുപ്പ് നടക്കവെ ലക്‌നൗവില്‍ വോട്ട് ചെയ്തതിന് ശേഷമായിരുന്നു മായാവതിയുടെ പ്രസ്താവന.
സമാജ്‌വാദി പാര്‍ട്ടിയെ ഉത്തര്‍പ്രദേശിലെ ജനങ്ങള്‍ തള്ളിക്കളഞ്ഞതാണെന്നും, എസ്പിയെന്നാല്‍ ഗുണ്ടാരാജ്, മാഫിയരാജ് എന്നാണ് അര്‍ത്ഥമെന്നും മായാവതി പറയുന്നു. ‘ സമാജ്‌വാദി പാര്‍ട്ടിയില്‍ ഇവിടുത്തെ മുസ്ലീങ്ങള്‍ ഒട്ടും സന്തുഷ്ടരല്ല. അവര്‍ നിങ്ങള്‍ക്ക് ഒരിക്കലും വോട്ട് ചെയ്യാന്‍ പോകുന്നില്ല. വോട്ടെടുപ്പിന് മുന്‍പ് തന്നെ യുപിയിലെ ജനങ്ങള്‍ എസ്പിയെ തള്ളിക്കളഞ്ഞതാണ്. എസ്പിയെന്നാല്‍ മാഫിയാരാജെന്നും ഗുണ്ടാരാജെന്നുമാണ് അര്‍ത്ഥം. ആ പാര്‍ട്ടിക്കുള്ളില്‍ കലാപം മാത്രമാണ് നടക്കുന്നത്. ഒരിക്കലും അധികാരത്തില്‍ എത്താന്‍ പോകുന്നില്ലെന്ന് എസ്പി നേതാക്കളുടെ മുഖത്ത് നിന്ന് തന്നെ വ്യക്തമാണെന്നും’ മായാവതി പറയുന്നു.
അതേസമയം ബിഎസ്പി അധികാരത്തില്‍ വരുമെന്നും സര്‍ക്കാര്‍ രൂപീകരിക്കുമെന്നും ബിഎസ്പി നേതാവ് എസ്.സി.മിശ്ര അവകാശപ്പെട്ടു. സംസ്ഥാനത്ത് വന്‍ ഭൂരിപക്ഷത്തോടെ ബിഎസ്പി അധികാരത്തില്‍ എത്തുമെന്ന് ഉറപ്പാണ്. മായാവതി അഞ്ചാം വട്ടവും യുപിയുടെ മുഖ്യമന്ത്രിയാകുമെന്നും മിശ്ര അവകാശപ്പെട്ടു. 2019ല്‍ ലോക്‌സഭാ തിരഞ്ഞെടുപ്പില്‍ അഖിലേഷ് യാദവും മായാവതിയും യോജിച്ച് പ്രവര്‍ത്തിച്ചിരുന്നു. എന്നാല്‍ പിന്നീട് അഭിപ്രായ വ്യത്യാസങ്ങളെ തുടര്‍ന്ന് ഇവര്‍ പിരിയുകയായിരുന്നു.
Comments