മുംബൈ: ഭാരതത്തെ വിശ്വഗുരുവായി ലോകത്തിന് മുന്നിൽ നിർത്താൻ ഓരോ വ്യക്തികളും പ്രയത്‌നിക്കണമെന്ന് ആർഎസ്എസ് സർസംഘചാലക് മോഹൻ ഭാഗവത്. ഡൽഹിയിൽ നടന്ന ഒരു പുസ്തക പ്രകാശന ചടങ്ങിൽ സംസാരിക്കുകയായിരുന്നു അദ്ദേഹം. ഇന്ത്യയെ ലോകത്തിന് മുന്നിൽ ഉയർത്തിപ്പിടിക്കണം, രാജ്യത്തെ ‘വിശ്വഗുരു’ ആക്കണം. ഇന്ത്യയുടെ പ്രശസ്തി വർധിപ്പിക്കണമെന്നുണ്ടെങ്കിൽ പുരാതന കാലം മുതൽ ഇന്നു വരെയുള്ള പൈതൃകം വീണ്ടെടുക്കേണ്ടതുണ്ടെന്നും അദ്ദേഹം പറഞ്ഞു.
പൗരാണിക നദിയായ സരസ്വതി നദിയുടെ അസ്തിത്വത്തെ കുറിച്ചും അദ്ദേഹം സംസാരിച്ചു. ‘ ഇന്ത്യയുടെ സാംസ്‌കാരിക പൈതൃകങ്ങളിൽ വിശ്വസിക്കുന്ന വലിയൊരു വിഭാഗം ആളുകൾ ഉണ്ട്. സരസ്വതി ഉണ്ടായിരുന്നുവെന്നും, അത് ഇപ്പോഴും നിലനിൽക്കുന്നുവെന്നുമാണ് അവർ വിശ്വസിക്കുന്നത്. എന്നാൽ ഇപ്പോഴത്തെ തലമുറ ഇതിനെല്ലാം തെളിവുകൾ ആവശ്യപ്പെടുകയാണ്. കാരണം നമ്മുടെ വിദ്യാഭ്യാസ സമ്പ്രദായം വിശ്വാസപരമായ കാര്യങ്ങളെ പ്രോത്സാഹിപ്പിക്കുന്നില്ല.’
‘ പണ്ഡിതന്മാർ തെളിയിച്ചാൽ ആളുകൾ അത് വിശ്വസിക്കും. തെളിവുകൾ സഹിതം ഇന്നത്തെ തലമുറയിലുള്ള കുട്ടികളുടെ പാഠപുസ്തകങ്ങളിൽ ഇക്കാര്യങ്ങൾ ഉൾപ്പെടുത്തണം. മുൻപ് രാമസേതുവിനെ കുറിച്ച് ആളുകൾ വിശ്വസിച്ചിരുന്നില്ല. വെറും പറച്ചിലാണെന്ന് അവർ കരുതി. പക്ഷേ പിന്നീട് അതിന്റെ തെളിവുകൾ പുറത്ത് വന്നപ്പോഴാണ് പലരും വിശ്വസിക്കാൻ തയ്യാറായതെന്നും’ അദ്ദേഹം പറഞ്ഞു.
