90കളിൽ ജനിച്ചവരുടെ ഏറ്റവും പ്രിയപ്പെട്ട കാർട്ടൂൺ കഥാപാത്രങ്ങളിലൊന്നാണ് പോപ്പോയ്.. ചീര കഴിച്ചയുടനെ കൈകളിലെ മസിലുകൾ വീർത്ത് വരികയും അതിശക്തനാവുകയും ചെയ്യുന്ന പോപ്പോയ് എന്ന കഥാപാത്രത്തെ ഇന്നത്തെ യുവത്വത്തിന് വിസ്മരിക്കാനാകില്ല. അങ്ങനെയെങ്കിൽ യഥാർത്ഥത്തിലൊരു പോപ്പോയ് ഉണ്ടോ.. ചീര കഴിച്ചിട്ടല്ലെങ്കിലും അസാധാരണമാം വിധം കൈകൾക്ക് വലിപ്പമുള്ള ഒരാൾ.. പലരും പോപ്പോയ് എന്ന് വിശേഷിപ്പിക്കുന്ന ജെഫ് ഡാബെ എന്ന മനുഷ്യനാണ് ഇപ്പോൾ സമൂഹമാദ്ധ്യമങ്ങളിലെ താരം.
സാധാരണയിൽ കവിഞ്ഞ വലിപ്പമാണ് ജെഫിന്റെ കൈകളുടെ പ്രത്യേകത. യുഎസിലെ മിന്നെസോട്ടയിൽ നിന്നുള്ള ജെഫ് തന്റെ കൈകൾ കാണിച്ച് കാഴ്ചക്കാരെ എപ്പോഴും അമ്പരപ്പിക്കാറുണ്ട്. കാരണം, ജെഫിന്റെ കൈത്തണ്ടയ്ക്ക് ഏകദേശം 20 ഇഞ്ചാണ് ചുറ്റളവ് വരുന്നത്. അതുകൊണ്ട് തന്നെ ജെഫിന്റെ കുഞ്ഞുനാൾ മുതലുള്ള ഹോബിയും കൈകളുമായി ബന്ധപ്പെട്ടതാണ്.. പഞ്ചഗുസ്തി മത്സരം..
സ്‌കൂളിൽ പഠിക്കുന്ന കാലത്താണ് ആദ്യമായി ജെഫ് പഞ്ചഗുസ്തി മത്സരത്തിൽ പങ്കെടുക്കുന്നത്. അന്നത്തോടെ ജെഫിന് പോപ്പോയ് എന്ന പേരും വീണു. ആദ്യമൊക്കെ സ്വന്തം പ്രായത്തിലുള്ളവരോടായിരുന്നു ജെഫിന്റെ മത്സരം. എല്ലാ കൂട്ടുകാരെയും പഞ്ചഗുസ്തിയിൽ ജെഫ് തോൽപ്പിച്ചു. പിന്നീട് മുതിർന്നവരോടായി കളി. അവരെയും ജെഫ് തോൽപ്പിച്ചു. എല്ലാ ടൂർണമെന്റുകളിലും സ്ഥിരം സാന്നിധ്യമായി.
എന്നാൽ ഇതിനിടെ ജെഫിന്റെ വലത് കൈമുട്ടിന് പരിക്കേറ്റു. ഇതോടെ പഞ്ചഗുസ്തിയെ സൈഡിൽ ഇരുത്തേണ്ടി വന്നു. എന്നാൽ പിന്നീട് തന്റെ ഇടതുകൈയുമായി ജെഫ് വീണ്ടുമെത്തി. മത്സരങ്ങളിൽ സജീവമായി. ദേശീയ കിരീടങ്ങൾ വരെ നേടി.
മറ്റൊന്ന് ജെഫിന്റെ വിവാഹമോതിരത്തിന്റെ വലിപ്പമാണ്. അഞ്ച് ഇഞ്ച് ചുറ്റളവിലുള്ള മോതിരമാണ് ജെഫ് അണിയുന്നത്. താൻ മറ്റുള്ളവരെ പോലെയാണെന്നും മറ്റുള്ളവർ ചെയ്യുന്നതെല്ലാം തന്റെ ഭീമാകാരമായ കൈകൾ കൊണ്ട് തനിക്ക് സാധിക്കുമെന്നുമാണ് ജെഫിനെ കണ്ട് അമ്പരക്കുന്നവരോട് അദ്ദേഹം മറുപടി പറയാറുള്ളത്. ബുദ്ധിമുട്ടുള്ള ഒരേയൊരു കാര്യം ഗ്ലൗസുകൾ വാങ്ങുന്നതാണ്. മനോഹരമായ ഗ്ലൗസുകൾ തനിക്ക് കിട്ടാറില്ലെന്ന് ജെഫ് പറയുന്നു. ആനിമേറ്റഡ് കഥാപാത്രമായ റെക്ക് ഇറ്റ് റാൽഫുമായി സാമ്യമുണ്ടെന്നും ജെഫിനെ പലരും വിശേഷിപ്പിക്കാറുണ്ട്..
