മുംബൈ: വിവേക് അഗ്നിഹോത്രി സംവിധാനം ചെയ്ത ദ കശ്മീർ ഫയൽസിനെ പ്രശംസിച്ച് ബോളിവുഡ് താരം കങ്കണ റണാവത്ത്. ഗംഭീര സിനിമയെന്നാണ് കങ്കണ റണാവത്ത് പറഞ്ഞത്. തീയേറ്ററിൽ നിന്നും സിനിമ കണ്ട ശേഷം മാദ്ധ്യമപ്രവർത്തകരോട് സംസാരിക്കുകയായിരുന്നു താരം. എല്ലാവരും തീയേറ്ററിൽ പോയി സിനിമ കാണണമെന്നും കങ്കണ റണാവത്ത് പറഞ്ഞു.
എലികളെ പോലെ മാളത്തിൽ ഒളിച്ചിരിക്കുന്നവർ പുറത്തിറങ്ങി സിനിമ കാണമെന്നും പ്രോത്സാഹിപ്പിക്കണമെന്നും കങ്കണ പരിഹസിച്ചു. വിലയില്ലാത്ത സിനിമകളെ പ്രോത്സാഹിപ്പിക്കുന്നതിന് പകരം ഇത്തരം നല്ല സിനിമകളെ പിന്തുണയ്‌ക്കണം. ഈ സിനിമയിലൂടെ ബോളിവുഡ് സിനിമാ മേഖലയിലുണ്ടായിരുന്ന പാപങ്ങൾ നീക്കം ചെയ്തിരിക്കുകയാണെന്നും കങ്കണ മാദ്ധ്യമപ്രവർത്തകരോട് പറഞ്ഞു.
ഇതാദ്യമായല്ല കങ്കണ റണാവത്ത് കശ്മീർ ഫയൽസിനെ പിന്തുണയ്‌ക്കുന്നതും സിനിമാ വ്യവസായത്തിനെതിരെ ആഞ്ഞടിക്കുന്നതും. നേരത്തെ കശ്മീർ ഫയൽസിനെ കുറിച്ച് പ്രതികരിച്ച് ഇൻസ്റ്റഗ്രാമിലൂടെ കങ്കണ എത്തിയിരുന്നു. കൊറോണ പശ്ചാത്തലത്തിന് ശേഷമുള്ള സിനിമകളെ കുറിച്ചുള്ള മിഥ്യാധാരണകളും മുൻവിധികളും തകർത്താണ് ചിത്രത്തിന്റെ ബോക്‌സ്ഓഫീസിലെ പ്രകടനം എന്നാണ് കങ്കണ പറഞ്ഞത്.
കശ്മീർ ഫയൽസിന്റെ വിജയത്തിൽ ബോളിവുഡ് മൗനം വെടിയണമെന്നും താരം അന്ന് പറഞ്ഞിരുന്നു. മികച്ച പ്രതികരണം ലഭിച്ചിട്ടും ചിത്രത്തെ കുറിച്ച് ഒരക്ഷരം മിണ്ടാത്തതിന് ബോളിവുഡ് താരങ്ങളെയും അവർ പരിഹസിച്ചിരുന്നു.
Comments